Галоўчанка: Ніякіх размоў пра продаж Расеі МЗКЦ не ідзе
Старшыня Дзяржкамваенпрама Раман Галоўчанка 7 лютага, адказваючы на пытанні журналістаў, абверг здагадкі аб магчымым продажы Расеі ААТ „Мінскі завод колавых цягачоў”.
„Хачу развеяць туман над гэтай сітуацыяй. Ніякіх размоў аб продажы, адчужэнні, абмене не ідзе”, – сказаў Раман Галоўчанка.
Ён адзначыў, што некалькі гадоў таму гэтая тэма абмяркоўвалася, але „была закрытая ў сувязі з аб’ектыўнымі абставінамі”. „І цяпер яе ніхто не педалюе”, – падкрэсліў кіраўнік Дзяржкамваенпрама. Раман Галоўчанка дадаў, што ніякіх кулуарных, нейкіх таргоў няма, назваўшы здагадкі аб продажы МЗКЦ пустыя домыслы.
Паводле яго слоў, нягледзячы на спрыяльны і канструктыўны фон, на якім развіваюцца вытворчыя адносіны з Расеяй, з’яўляюцца інфармацыйныя ўкіды, якія носяць дэструктыўны характар і накіраваныя на ачарненне рэальнай працы таго ж Мінскага завода колавых цягачоў. Прыводзяцца аргументы, што МЗКЦ – гэта заслуга Савецкага Саюза, а не Беларусі, пра тое, што завод гандлюе тэхналогіямі, прадае сакрэты, што ў МЗКЦ нізкая якасць і таму Расеі варта адмовіцца ад яго прадукцыі „За гады незалежнасці Беларусі ў прадпрыемства ўкладзена $ 150-150 млн. Цяпер гэта прадпрыемства, абсталяванае па самым апошнім слове тэхнікі. МЗКЦ ніякімі тэхналогіямі не гандлюе, МЗКЦ прадае гатовую прадукцыю „, – адзначыў Раман Галоўчанка.
