Высокая інфляцыя можа стаць прычынай адстаўкі кіраўніцтва Нацбанка
Нагадаем, на мінулым тыдні адбылася сустрэча кіраўніка Нацбанка Паўла Калаура з Аляксандрам Лукашэнкам, на якой кіраўнік дзяржавы паведаміў, што цэнтральны банк ініцыюе пашырэнне сваіх паўнамоцтваў для забеспячэння фінансавай стабільнасці.
У афіцыйным паведамленні па выніках сустрэчы не называліся паўнамоцтвы, пра якія просіць Нацбанк. „Але тое, што мне даложана, я абсалютна падтрымліваю”, — сказаў Лукашэнка, звяртаючыся да Калаура.
Як стала вядома БелаПАН, у Банкаўскі кодэкс плануецца ўнесці норму, згодна з якой праўленне Нацыянальнага банка можа быць адпраўленае ў адстаўку (у выпадку, калі на працягу некалькіх гадоў інфляцыя будзе вышэйшая за прагназаваную). Праект зменаў у Банкаўскі кодэкс прадугледжвае, што замест устаноўкі цяперашніх гадавых прагнозаў па інфляцыі будзе зацвярджацца сярэднетэрміновай арыенцір — на тры гады.
Цэнтральны банк прапануе даць яму права апублікаваць унутраны прагноз сацыяльна-эканамічнага развіцця, адрозны ад урадавага.
„Цяпер Нацбанк не аперуе ў публічнай прасторы сваімі ўнутранымі прагнозамі, і гэта не дазваляе цэнтральнаму банку правільна тлумачыць свае рашэнні. Цяпер грамадства не ведае, на якіх эканамічных прагнозах заснаваныя рашэнні, што прымаюцца Нацбанкам”, — растлумачыў суразмоўца БелаПАН у фінансавых колах сутнасць магчымых зменаў.
Эксперт звярнуў увагу, што ў Расеі цэнтральны банк валодае адпаведнымі паўнамоцтвамі і можа апублікаваць эканамічны прагноз, які адрозніваецца ад урадавага.
Паводле звестак БелаПАН, у выпадку, калі падрыхтаваныя прапановы будуць прынятыя, Асноўныя напрамкі грашова-крэдытнай палітыкі, якія цяпер штогод зацвярджаюцца кіраўніком дзяржавы, Нацбанк будзе зацвярджаць самастойна.
Беларускія эканамісты лічаць, што для забеспячэння цэнавай і ў цэлым фінансавай стабільнасці аперацыйную незалежнасць Нацбанка неабходна пашырыць.
Старшыня наглядальнага савета даследчага цэнтра ІПМ Ігар Пеліпась адзначае, што Нацбанк плануе перайсці на рэжым таргетавання інфляцыі з мэтай утрымання цэнавай стабільнасці.
„Адзін з важных элементаў рэжыму таргетавання інфляцыі — камунікацыйная палітыка. Каб Нацбанк праз працэнтную стаўку мог уплываць на інфляцыю, грамадства павінна давяраць палітыцы і прагнозам цэнтральнага банка”, — падкрэслівае Ігар Пеліпась.
Эксперты лічаць таксама, што цэнтральны банк павінен мець мандат на абнародаванне прагнозу, адрознага ад прагнозу ўрада.
„Каб кіраваць інфляцыяй, трэба кіраваць чаканнямі, а для гэтага ў Нацыянальнага банка павінна быць права агучваць свой прагноз. Калі палітыцы Нацбанка давяраюць, кампаніі будуць закладваць прагноз цэнтральнага банка пры падрыхтоўцы сваіх бюджэтаў і пры фарміраванні цэн. Адпаведна, заявы цэнтрабанка стануць уплываць на інфляцыю”, — мяркуе акадэмічны дырэктар Беларускага эканамічнага даследча-адукацыйнага цэнтра (BEROC) Кацярына Барнукова.
