“Унукам”: першая прэзентацыя спадчыны Геніюш у Беларусі
Першая прэзентацыя кнігі Ларысы Геніюш “Унукам”, дзе складальнікам быў журналіст і паэт Глеб Лабадзенка, адбылася ў гарадзенскім Цэнтры гарадскога жыцця. Стварэнне кнігі вершаў і лістоў пісьменніцы адбылася дзякуючы яе ўнуку Міхасю Геніюш, які стала жыве ў Беластоку.
– Пачалі выходзіць розныя кніжкі Ларысы Геніюш. І я падумаў, што вазьму ўсё гэта ў свае рукі і пастараюся, каб гэта было так, як трэба. Усе кнігі аформілі, засталіся толькі дзіцячыя вершы. Былі дзве кніжачкі: «Казкі для Міхаські» і «Добрай раніцы, Алесь». Адна была напісаная для мяне, другая – для майго брата. Памятаю, як мая бабуля Ларыса Геніюш чытала гэтыя вершы.
На думку Глеба Лабадзенкі, над усімі папярэднімі кнігамі паэткі папрацавалі савецкія цэнзары, якія выразалі і “крамсалі на кавалкі” яе вершы.
– Нават па дзіцячых вершах Ларысы Геніюш праехаліся катком. Вельмі часта гэта абсалютна бяздарная рэдактура, якая нішчала рытм, рыфму, скарачала верш у пяць разоў. Адну і другую кніжку рэдагаваў дзіцячы паэт Авяр’ян Дзеружынскі. Я яго не заспеў, але спытаўся ў жонкі Барадуліна, якая працавала разам з ім, і яна сказала, што ён быў не самы лепшы дзіцячы паэт, але амбіцыі былі вялікія. Рэдагуючы кнігу Ларысы Геніюш, ён зайздросціў, бо разумеў, што яна лепшая за яго, таму браў і адмыслова псаваў яе вершы.
На сустрэчы гарадзенцы ўзгадвалі сваё знаёмства з паэткай, яе творчасцю, а Глеб Лабадзенка і Міхась Геніюш прачыталі некалькі яе вершаў.
Беларускае Радыё Рацыя, Гародня
Глядзіце таксама
