МЗС Беларусі выказала сваю пазіцыю адносна Маршу „выклятых жаўнераў”
Міністэрства замежных спраў Беларусі выказала сваю пазіцыю пра праварадыкальную акцыю ў польскай Гайнаўцы.
Як вядома, у Гайнаўцы, месцы кампактнага пражывання этнічных беларусаў у Польшчы, нягледзячы на справядлівае супрацьдзеянне мясцовых ўлад 23 лютага можа адбыцца праварадыкальная акцыя, так званы марш памяці.
У сувязі з гэтым начальнік упраўлення інфармацыі і лічбавай дыпламатыі – прэс-сакратар МЗС Беларусі Анатоль Глаз пракаментаваў дадзеную сітуацыю: „Мы ўспрымаем гэтую інфармацыю, мякка кажучы, з вялікім шкадаваннем. Асабліва на фоне нядаўняга аб’ектыўна значнага візіту ў Польшчу нашай дэлегацыі пад кіраўніцтвам старшыні Савета Рэспублікі Нацыянальнага сходу Міхаіла Мясніковіча „.
„Бандфарміраванне пад кіраўніцтвам ваеннага злачынцы Рамуальда Райса, вядомага пад псеўданімам Буры, якога плануюць праслаўляць нацыяналісты падчас так званага Маршу „выклятых жаўнераў”, у 1946 годзе зрабіла крывавы рэйд па Падляшшы, у выніку якога былі спалены пяць вёсак і забіта 79 мірных жыхароў краю. Такіх злачынцаў нельга атаясамліваць з барацьбой за незалежнасць Польшчы, іх дзейнасць носіць рысы генацыду. Па гэтай прычыне мы выступалі і выступаем супраць гларыфікацыі і ўшанавання памяці Рамуальда Райса і яго салдат”, – растлумачыў Анатоль Глаз.
Афіцыйны прадстаўнік МЗС перакананы, што марш 23 лютага ў горадзе, дзе кампактна пражываюць этнічныя беларусы, у тым ліку нашчадкі тых, хто загінуў з-за Бурага, – гэта правакацыя, накіраваная на стварэнне напружанасці, канфліктаў на нацыянальнай, рэлігійнай і гістарычнай глебе паміж беларусамі і палякамі. „Выказваем надзею, што прадстаўнікі ўладаў і грамадзяне Польшчы змогуць даць падобным акцыям належную ацэнку, выступіць супраць іх правядзення і не дапусціць арганізацыі такіх мерапрыемстваў у далейшым, забараніўшы іх на заканадаўчым узроўні”, – падкрэсліў Анатоль Глаз.
