„Расстраляная Беларусь”: лекцыя Алеся Смаленчука ў Гародні
Адкрытая лекцыя прафесара Алеся Смаленчука „Расстраляная Беларусь”, прысвечаная перыяду масавых палітычных рэпрэсіяў і асабістай адказнасці за „Вялікі тэрор” Сталіна, пройдзе ў гарадзенскім Цэнтры гарадскога жыцця, на вуліцы Кірава, дом 3. Пачатак лекцыі а 19-ай гадзіне, 22-га сакавіка.
Адкрытая лекцыя павінна ўзнавіць дыскусію пра пошукі месцаў масавых забойстваў мірных жыхароў у Гародні. Гэтаму можа дапамагчы кожны жыхар горада, кажа Алесь Смалянчук.
– Гарадзенскія і на Гарадзеншчыне месцы памяці тых страшных камуністычных сталінскіх рэпрэсій збольшага мала вядомыя нам. Калі я заяўляў гэтае пытанне, то хацеў проста паразмаўляць з людзьмі і абмеркаваць тое, што мы ведаем зараз. А ведаем мы мала. Прыгадваюць пра рэпрэсіі 39-40 гадоў, калі расстрэльвалі ў горадзе. Тут фігуруе, напрыклад, гарадзенская турма. Я не буду казаць пра тое, што я ведаю, што я ўстанавіў. Хутчэй гаворка ідзе пра чалавечую памяць, пра тое, што захавалася ў памяці.
З вуснай калектыўнай памяці гарадзенцы прыгадваюць, што такімі месцамі забойстваў органамі НКУС былы гэтак званая Сабачая горка, старыя каталіцкія могілкі, урочышча „Сакрэт”, лесапарк „Пышкі”. На лекцыі можна будзе задаць пытанні, паўдзельнічаць у дыскусіі. Уваход на лекцыю вольны.
Якуб Сушчынскі, Беларускае Радыё Рацыя. Гародня
