Румас: „Вялікі камень” трансфармуецца ў тэхналагічны горад-спадарожнік Менска
Кітайска-беларускі індустрыяльны парк „Вялікі камень” трансфармуецца ў тэхналагічны горад-спадарожнік Менска, заявіў прэм`ер-міністр Беларусі Сяргей Румас 3 красавіка на сустрэчы з намеснікам старшыні пастаяннага камітэта Усекітайскага сходу народных прадстаўнікоў (парламента) Шэнь Юэюэ, якая наведвае Менск.
„Дзякуючы сумеснай працы спецыялістаў Беларусі і Кітая парк ужо стаў месцам прыцягнення замежных інвестыцый, тэхналогій і людскіх рэсурсаў. У парку ўжо зарэгістраваныя 43 рэзідэнты, у тым ліку з ЗША, Еўрапейскага саюза, Ізраіля, Канады і Расеі. Таму зараз мы ўжо можам называць гэты парк не толькі беларуска-кітайскім, але і міжнародным”, — цытуе Румаса прэс-служба ўрада.
Паводле яго слоў, „правінцыя Чжэцзян, якая з`яўляецца малой радзімай Шэнь Юэюэ, сёння адзін з самых развітых з эканамічнага пункту гледжання рэгіёнаў, там размяшчаецца штаб-кватэра карпарацыі „Алібаба”. „З улікам рэбрэндынгу парку „Вялікі камень” былі б рады стварэнню ў парку субпарку правінцыі Чжэцзян, а таксама прыходу ў парк буйных высокатэхналагічных кампаній з вашай правінцыі”, — дадаў прэм`ер-міністр.
Кіраўнік урада таксама закрануў тэму рэгіянальнага ўзаемадзеяння, „якое павінна стаць лакаматывам развіцця беларуска-кітайскіх эканамічных стасункаў”. „У гэтым пытанні мы разлічваем на ваша спрыянне, улічваючы ваш вопыт кіруючай работы ў горадзе Ханчжоу”, — адзначыў Румас.
У прэс-службе звярнулі ўвагу, што сустрэча ва ўрадзе прайшла напярэдадні другога міжнароднага форуму „Адзін пояс і адзін шлях” у Пекіне. „На палях форуму пройдзе сустрэча лідараў Беларусі і Кітая, таму цяперашні візіт намесніка старшыні пастаяннага камітэта Усекітайскага сходу народных прадстаўнікоў у Мінску разглядаюць як этап падрыхтоўкі сустрэчы на вышэйшым узроўні”, — адзначаецца ў рэлізе.
Кітайска-беларускі індустрыяльны парк „Вялікі камень” — тэрыторыя плошчай 91,5 кв. км за 25 км ад Менска з асаблівым прававым рэжымам, які забяспечвае камфортныя ўмовы вядзення бізнесу. Прыярытэтныя напрамкі развіцця: электроніка, біямедыцына, тонкая хімія, машынабудаванне і новыя матэрыялы.
З мэтай павышэння экспартнага патэнцыялу „Вялікага каменя” беларускія ўлады далі беспрэцэдэнтныя льготы рэзідэнтам індустрыяльнага парку. У прыватнасці, на ўвесь тэрмін дзеяння спецыяльнага прававога рэжыму (50 гадоў) рэзідэнт парку вызваляецца ад падатку на нерухомасць і зямельнага падатку. Акрамя таго, рэзідэнтаў парку дзяржава вызваліла ад выплаты падатку на прыбытак на працягу 10 гадоў з даты яго ўзнікнення.
У парку зарэгістраваныя 43 рэзідэнты. У найбліжэйшы час на базе парку плануецца стварыць інвестыцыйны фонд для падтрымкі малога і сярэдняга бізнесу.
belapan.by
