Футбольная зборная Беларусі апусцілася на 81-е месца ў рэйтынгу ФІФА
Зборная Беларусі займае 81-е месца ў апублікаваным сёння рэйтынгу Міжнароднай федэрацыі футбола (ФІФА). У параўнанні з папярэднім спісам, які быў абнародаваны 7 лютага, каманда Ігара Крывушэнкі апусцілася на 3 пазіцыі, маючы цяпер 1301 бал.
За мінулы час беларускія футбалісты пацярпелі два гасцявыя паражэнні на старце адборачнага турніру чэмпіянату Еўропы: ад Нідэрландаў – 0:4 і Паўночнай Ірландыі – 1:2. Галандцы займаюць цяпер 16-е месца (1554 балы), паўночнаірландцы знаходзяцца на 33-й пазіцыі (1481). Астатнія апаненты беларусаў па групе С займаюць такія месцы: 13-е – Германія (1570), 96-е – Эстонія (1240). Два наступныя матчы кваліфікацыі Еўра-2020 зборная Беларусі правядзе на полі „Барысаў-Арэны”: 8 чэрвеня супраць каманды Германіі і 11 чэрвеня супраць Паўночнай Ірландыі.
Топ-10 красавіцкага рэйтынгу ФІФА:
1. Бельгія – 1737 балаў,
2. Францыя – 1734,
3. Бразілія – 1676,
4. Англія – 1647,
5. Харватыя – 1621,
6. Уругвай – 1613,
7. Партугалія – 1607,
8. Швейцарыя – 1604,
9. Іспанія – 1601,
10. Данія – 1586.
З краін былога Савецкага Саюза вышэй за ўсіх знаходзіцца Украіна, у якой 27-е месца, гаспадар ЧС-2018 Расея займае 46-ю пазіцыю.
Наступны рэйтынг ФІФА будзе апублікаваны 14 чэрвеня.
