Мікалая Статкевіча арыштавалі на 15 сутак, Максіма Вінярскага — на 13
Суд Цэнтральнага раёна Менска арыштаваў апазіцыйнага палітыка Мікалая Статкевіча на 15 сутак, паведаміла БелаПАН яго жонка Марына Адамовіч. Суд над Статкевічам доўжыўся 5 хвілінаў.
Статкевіча асудзілі па арт. 23.34 Кодэкса аб адміністрацыйных правапарушэннях за заклік да несанкцыянаванай акцыі. Палітык адмовіўся ўдзельнічаць у судзе, заявіўшы, што гэта быў малебен. Працэс вяла суддзя Вікторыя Шабуня.
Паводле слоў Адамовіч, Статкевіча вывезлі ў 5 гадзін раніцы з ізалятара часовага ўтрымання на вул. Акрэсціна, а судовы працэс доўжыўся пяць хвілін. Яна адзначыла, што Статкевіч заклікаў вернікаў штотыдзень выходзіць у 12.00 да галоўных храмаў сваіх гарадоў, і звязвае затрыманне з падрыхтоўкай уладаў да прэзідэнцкіх выбараў.
Палітык быў затрыманы 7 красавіка на выхадзе са свайго дома. Ён накіроўваўся на ініцыяваны ім малебен ля Свята-Духава кафедральнага сабора на плошчы Свабоды.
Таксама Адамовіч паведаміла, што суд Фрунзенскага раёна на 13 сутак арыштаваў актывіста Максіма Вінярскага па арт. 23.34 КаАП за заклік да несанкцыянаванай акцыі.
Глядзіце таксама
