Лукашэнка і Пуцін абмеркавалі сітуацыю з пастаўкамі расейскай нафты

„Так, мы вельмі коратка абмяняліся думкамі па гэтай справе”, — прыводзіць словы Пуціна Gazeta.ru.

Пуцін паабяцаў правесці расследаванне па трубаправоду „Дружба” з прыцягненнем спецслужбаў, калі карпаратыўнага расследавання будзе мала.

„Каб зразумець, што там адбылося, трэба правесці расследаванне, — сказаў Пуцін, адказваючы на пытанне ТАСС на прэс-канферэнцыі па выніках візіту ў КНР. — Перш за ўсё трэба правесці расследаванне на ўзроўні самой” Транснафты „і выявіць месца, адкуль папала, па якіх прычынах, што патрапіла. Гэта расследаванне праводзіцца цяпер, калі недастаткова будзе ўнутрыкарпаратыўнага расследавання, я не выключаю, што мы правядзем і больш дбайнае, з дапамогай праваахоўных органаў і спецыяльных службаў”.

Пра тое, што з сярэдзіны красавіка па нафтаправодзе „Дружба” паступае няякасная нафта, паведаміў тыдзень таму „Белнафтахім”.

22 красавіка стала вядома, што з-за няякаснай расейскай нафты на Мазырскім НПЗ выйшла са строю дарагое абсталяванне.

23 красавіка намеснік гендырэктара Беларускай нафтавай кампаніі Сяргей Грыб паведаміў, што Беларусь прыпыніла пастаўкі нафтапрадуктаў ва Украіну, Польшчу і краіны Балтыі.

24 красавіка наваполацкі завод „Нафтан” пачаў прымаць чыстую нафту з Расеі па нафтаправодзе Сургут — Полацк, тады як на Мазырскі НПЗ па-ранейшаму паступае нафта з павышаным утрыманнем хлорарганікі. Заводы працуюць на загрузцы прыкладна 50% ад узроўню да пастаўкі нафты з пагоршанымі характарыстыкамі. Намеснік старшыні канцэрна „Белнафтахім” Уладзімір Сізоў паведаміў журналістам, што страты Беларусі ў выглядзе недаатрыманай выручкі ад рэалізацыі нафтапрадуктаў склалі 100 млн долараў.

25 красавіка пастаўкі светлых нафтапрадуктаў ва Украіну і Польшчу былі часткова адноўленыя. Транзіт расейскай нафты ў Еўропу па нафтаправодзе „Дружба” спынены цалкам.

Па выніках праведзеных 26 красавіка ў Менску чатырохбаковых перамоў па пытанні аднаўлення працы нафтаправода „Дружба” намеснік міністра энергетыкі Расеі Павел Сарокін заявіў, што чыстая нафта на мяжы з Беларуссю чакаецца да канца красавіка.

„Белнафтахім” разлічвае ў траўні аднавіць у поўным аб`ёме выпрацоўку нафтапрадуктаў і пастаўку на экспарт, сказаў журналістам старшыня канцэрна Андрэй Рыбакоў. „Калі казаць пра задаволенасць у поўным аб`ёме, то яна наступіць тады, калі сітуацыя будзе нармалізаваная па ўсіх напрамках, ад нафтаперапрацоўкі да транзіту, і, безумоўна, будуць выпрацаваны ўсе кампенсацыйныя механізмы, каб увайсці ў нармальныя эканамічныя параметры як на ўзроўні нашых суб`ектаў гаспадарання, так і на ўзроўні краін. На наступным тыдні мы працягнем нашы перамовы ў больш шырокім коле”, — паведаміў Рыбакоў.

Тым часам у Расеі заведзена крымінальная справа аб наўмысным забруджванні нафты ў нафтаправодзе „Дружба”. Пра гэта паведаміў журналістам 26 красавіка ў Маскве саветнік прэзідэнта кампаніі „Транснафта” Ігар Дзёмін. Паводле яго слоў, у Самары, у офісах некалькіх прыватных арганізацый, праходзяць следчыя дзеянні.

belapan.by