Андрэй Стрыжак: Забаронай „георгіеўскай стужкі” прапаганду не спыніць
„Забарона распаўсюду георгіеўскіх стужак – адзін з самых неэфектыўных метадаў барацьбы супраць прапаганды”, – лічыць праваабаронца Андрэй Стрыжак.
Ён мяркуе, што адміністрацыйныя меры могуць выклікаць адваротны вынік:
– Трэба працаваць з грамадскай думкай беларусаў, трэба даводзіць альтэрнатыву, але гэта вельмі далёкі і доўгі шлях. Зараз вельмі вялікае пытанне, ці ёсць у нас на гэта час, ці паспеем мы гэта ўсё зрабіць, але ўсё роўна гэта трэба рабіць. Тая ініцыятыва, якая зараз з’явілася, з налепкамі „Пагоня” на краўндфандынгавай платформе molamola – гэта добрая ініцыятыва. Можна даць нейкую капейчыну і спрыяць таму, каб дзясяткі тысячаў налепак з’явіліся ў горадзе, яны былі раздадзеныя, з’явіліся на аўтамабілях, ноўтбуках, яшчэ дзе-небудзь.
Георгіеўская альбо гвардзейская стужка – геральдычны элемент часоў Расейскай імперыі. Мае падабенства з гвардзейскай стужкай, якая прысутнічала на ўзнагародах савецкіх салдат і афіцэраў падчас ІІ Сусветнай вайны.
У 2014 годзе гэты сімвал сталі актыўна выкарыстоўваць прарасейскія сепаратысты на ўсходзе Украіны і ў Крыме, пасля чаго георгіеўская стужка была забароненая ва Украіне.
Беларускае Радыё Рацыя, Гомель
