Пішыце чарадзейныя казкі па-беларуску! Дзіцячы конкурс у Віцебску
Віцебская абласная філія Саюза беларускіх пісьменнікаў супольна з тэатрам “Лялька” і мясцовымі курсамі “Мова нанова” абвясцілі дзіцячы літаратурны конкурс “Казка – цудоўная краіна”.
Да ўдзелу запрашаюцца жыхары Віцебскай вобласці ва ўзросце ад 7 да 14 гадоў. Але ёсць самая галоўная ўмова для ўдзельнікаў, папярэджвае старшыня Віцебскай філіі СБП Настасся Лазебная:
-Абавязкова на беларускай мове! Гэта галоўная наша ўмова. Чаму на беларускай мове? Шчыра скажу: жывучы ў Віцебску, я абураюся, чаму тут не размаўляюць на мове. Што ж гэта такое? Нават калі дзеці будуць перакладаць свае казкі з расейскай на беларускую, яны ж нешта засвояць! У слоўнік зазірнуць! Нават калі бацькі будуць дапамагаць напісаць тую казку, таксама ўжо нешта будуць ведаць.
Пераможцаў узнагародзяць на ўрачыстай цырымоніі ў тэатры “Лялька”. Прызамі будуць кнігі ад Саюза беларускіх пісьменнікаў. Узнагароды рыхтуе і Настасся Лазебная, аўтарка дзіцячых казак, якая друкуецца пад псеўданімам Стася Наркевіч.
Яна падорыць юным казачнікам дэкаратыўныя імянныя падушкі ўласнага вырабу.
Настасся Лазебная і Таццяна Дубоўская
Адмысловы сюрпрыз рыхтуюць і курсы “Мова нанова”, кажа вядоўца курсаў Таццяна Дубоўская:
-Падчас цырымоніі курсы “Мова нанова” хочуць зрабіць такі відэаролік цікавы – з удзельнікамі, з пераможцамі, каб паказаць, якія ў нас таленавітыя дзеткі. І можна будзе потым падсумаваць нейкі агульны вынік: на якія тэмы дзеці пішуць, ці дастатковы ў іх слоўнікавы запас, ці ёсць у іх вобразнае мысленне. Гэта, канешне, пасля ўжо будзем ацэньваць.
Конкурс чарадзейных беларускіх казак стартаваў 1 траўня і завершыцца 1 лістапада.
Ганна Ліпка, Беларускае Радыё Рацыя
