Раман Катажыны Бонды “Акулярнік” выйдзе па-беларуску
Цягам некалькіх месяцаў у выдавецтве “Янушкевіч” выйдзе раман касавай польскай пісьменніцы Катажыны Бонды “Акулярнік”. Аўтарка, якую называюць “каралевай польскага дэтэктыву”, паходзіць з Падляшша, вучылася ў беларускім ліцэі ў Гайнаўцы і адкрыта кажа пра “100%-е беларускае паходжанне”.
У кнізе, між іншым, адлюстраваная сямейная гісторыя Катажыны Бонды. Яе цяжарную бабулю забіў адзін з партызанаў Рамуальда Райса “Бурага”. Беларускае выданне будзе мець каля 800 старонак. Выдавецтва абяцае, што беларусы змогуць набыць кнігу па-беларуску ўжо гэтым летам.
Кнігі Катажыны Бонды выдаюцца накладам больш за 150 тысяч асобнікаў. Неаднаразова яны былі рэкардсменамі продажаў у польскіх кнігарнях.
Беларускае Радыё Рацыя
Фота: Cezary Piwowarski/wikimedia
