Продаж алкаголю абмяжуюць у Менску 29 траўня і 8 чэрвеня
У Менску абмяжуюць продаж алкаголю 29 траўня і 8 чэрвеня. Гэта прадугледжана рашэннем Менскага гарадскога выканаўчага камітэта нумар 1247 ад 25 красавіка 2019 года, якое сёння апублікавана на Нацыянальным прававым інтэрнэт-партале.
У сувязі з правядзеннем апошніх званкоў і выпускных вечароў ва ўстановах агульнай сярэдняй адукацыі з 08.00 29 траўня да 08.00 30 траўня і з 08.00 8 чэрвеня да 08.00 9 чэрвеня на тэрыторыі сталіцы будзе абмежаваны продаж алкагольных напіткаў (гарэлкі, лікёра-гарэлачных вырабаў, віна, каньяку, брэндзі, кальвадосу, шампанскага і іншых напіткаў з аб’ёмнай доляй этылавага спірту 7 працэнтаў і больш). Выключэнне складзе рознічны гандаль на аб’ектах грамадскага харчавання ў разліў.
Таксама ў гэтыя дні ў гандлёвых аб’ектах Менска не будуць прадавацца піва і слабаалкагольныя напіткі з аб’ёмнай доляй этылавага спірту не больш за 7 працэнтаў.
Рашэнне ўступае ў сілу пасля яго афіцыйнага апублікавання.
