Прэзентацыя “Поўні” Міхала Андрасюка ў Беластоку
“Поўня” ў Беластоку. Міхал Андрасюк прэзентаваў сваю новую кнігу беластоцкаму чытачу. Восьмае па ліку выданне падляшскага празаіка ёсць ягонай пятай кнігай на беларускай мове.
Кажа аўтар:
– Адрозніваецца ад тых кніжак, якія я напісаў раней, тым, што выходзіць па-за межы Падляшша. Кніжка ідзе па трохвугольніку Белавежская пушча – Беласток – Менск. Таксама кніжка выходзіць за межы часу і прасторы, за межы рэальнага. Шмат біяграфічнага ў ёй. Шмат сябе я паклаў у гэтую кнігу. Тым не менш, гэта ў многім лёсы пакалення, лёсы рэгіёна.
Падчас прэзентацыі прагучалі фрагменты рамана ў перакладзе Марціна Рэмбача. На думку перакладчыка, новай кнізе Міхала Андрасюка ўласцівая больш эмацыянальная мова:
– У выпадку “Поўні” гаворка ідзе пра пошук праўды, нават горкай, уздымаецца пытанне сваёй будучыні, будучыні свайго народа. Мне лягчэй было працаваць з папярэднімі яго кнігамі, бо там мова была больш упарадкаваная, а тут маем дачыненне з мовай больш індывідуалізаванай.
Гэта трэцяя прэзентацыя “Поўні”, першая прайшла ў Гайнаўцы, другая – у Менску.
Ганна Комінч, Беларускае Радыё Рацыя, Беласток
Фота аўтаркі
Глядзіце таксама
