У Беларусі не адбылося істотнага паляпшэння cітуацыі з правамі чалавека
За мінулы год у Беларусі не адбылося істотнага паляпшэння cітуацыі з правамі чалавека, аднак былі некаторыя пазітыўныя змены. Пра гэта гаворыцца ў справаздачы спецдакладчыка ААН па сітуацыі з правамі чалавека ў Беларусі Анаіс Марын, які яна прадставіла на летняй сесіі Рады ААН па правах чалавека у Жэнэве. У якасці пазітыўных зменаў Марын адзначае дэкрыміналізацыю артыкула 193.1 Крымінальнага кодэкса (дзейнасць незарэгістраваных арганізацый).
Каментуе намеснік старшыні Праваабарончага цэнтра „Вясна” Валянцін Стэфановіч:
– Мы канешне гэты крок вітаем. Гэта тое, чаго дамагалася грамадзянская супольнасць Беларусі фактычна з 2006 года. Але нашая радасць азмрочаная тым, што ўлады не адмовіліся ад адмены поўнай забароны на дзеянне незарэгістраваных арганізацый. Забарона застаецца. І замест крымінальнай адказнасці ўводзяць адміністрацыйную адказнасць у выглядзе штрафу 50 базавых велічыняў і прычым да адміністрацыйнай адказнасці могуць прыцягваць у пазасудовым парадку.
Акрамя таго беларускія ўлады прызвычаіліся выбарча падыходзіць да рэкамендацый ААН, дадае праваабаронца.
– Для нашага ўраду больш важная працэдура УПО – Універсальнага перыядычнага агляду, яны лічаць, што гэта такі добры і паспяховы варыянт супрацы з ААН. Для нас, як праваабаронцаў, важныя рэкамендацыі КПЧ, бо іх робяць эксперты, камітэт.
У справаздачы спецдакладчыка ААН па сітуацыі з правамі чалавека ў Беларусі Анаіс Марын сярод станоўчых момантаў адзначаецца ўнясенне ў Закон аб масавых мерапрыемствах паправак, якія ўвялі паведамляльны (нароўні з заяўным) прынцып правядзення масавых мерапрыемстваў. Разам з тым павялічаная аплата на абслогоўванне такіх мерапрыемстваў, што ўжо прывяло сёлета да адмены Чарнобыльскага шляху, нагадвае Валянцін Стэфановіч.
Цалкам матэрыял у далучаным файле:
Антон Разумоўскі, Беларускае Радыё Рацыя
