Прысуд журналісту-фрылансеру Андрэю Мялешку пакінулі ў сіле (абноўлена)
У абласным судзе Гародні 8 студзеня адбыўся разгляд касацыйнай скаргі журналіста-фрылансера Андрэя Мялешкі.
У снежні ў судзе Ленінскага раёна Гародні яго прысудзілі да штрафу ў 40 базавых велічынь за супрацу з Беларускім Радыё Рацыя як сродкам масавай інфармацыі, якое не мае акрэдытацыі пры Міністэрстве замежных спраў Беларусі. Журналіст не пагадзіўся з прысудам і вырашыў яго абскардзіць пры дапамозе юрыстаў Беларускай Асацыяцыі журналістаў.
– Я меў невялікае спадзяванне на тое, што суд нешта зменіць. Але нічога не змянілася, і суддзя пакінуў рашэнне папярэдняга суда ў сіле. Суддзя Анатоль Заяц прачытаў амаль поўнасцю скаргу на 4 старонках, якая была зроблена юрыстамі БАЖ, і мяне здзівіла, што ён падыходзіў да кожнага пункту, на якія я спасылаўся, – на Канстытуцыю, на Міжнародны пакт, на пункт самога артыкула Адміністрацыйнага кодэксу 22.9, і рабіў выгляд, што нешта спрабуе вырашыць.
Па словах Андрэя Мялешкі, ён пакуль не вырашыў ці будзе падаваць скаргі далей у Вярхоўны суд Рэспублікі Беларусь, але мае намер дайсці да разбіральніцтва яго справы ў камітэце ААН па правах чалавека.
Антон Разумоўскі, Беларускае Радыё Рацыя
* * *
Суддзя гарадзенскага абласнога суда Анатоль Заяц не задаволіў касацыйную скаргу гарадзенскага журналіста-фрылансера Андрэя Мялешкі. Журналіст даводзіў праз касацыю, што суд першай інстанцыі на чале Юрыя Казакевіча незаконна прысудзіў яму адміністрацыйны штраф у суме шасці мільёнаў беларускіх рублёў. Адным з абвінавачванняў было тое, што ён працуе без акрэдытацыі для Беларускага Радыё Рацыя. “Але, паводле беларускага заканадаўства, такога адміністрацыйнага пакарання ўвогуле не існуе,” – кажа Андрэй Мялешка.
– З кожным разам надзея памяньшаецца. Ідзе на тое, што суддзі пачнуць разумець тыя заканадаўчыя акты, згодна якіх я працую, і прытрымлівацца іх таксама. Пакуль гэта незаўважальна. На маю думку, трэба, каб кожны журналіст падаваў скаргі, ціснуў на сістэму кожны раз, як парушаюцца правы і нават Канстытуцыя краіны, у якой яны жывуць. Але гэта, на маю думку, дае толькі псіхалагічны ціск.
Адміністрацыйны штраф, які ленінскі раённы суд Гародні прысудзіў Андрэю Мялешку, базаваўся таксама і на тым, што журналіст “вырабіў і распаўсюдзіў інфармацыю на сайце Беларускага Радыё Рацыя.” Яго суд аштрафаваў, хоць давесці пра “выраб інфармацыі” не змог. “Мяне аштрафавалі за тое, што я прытрымліваюся Канстытуцыі Беларусі ды міжнародных пактаў, якія падпісала нашая краіна,” – падводзіць вынік суда Андрэй Мялешка. Цяпер Андрэй плануе давесці сваю касацыйную скаргу на Ленінскі раённы суд да міжнароднага камітэта па правах чалавека.
Якуб Сушчынскі, Беларускае Радыё Рацыя, Гародня
Фота аўтара
Глядзіце таксама
