Настасся Лазебная: Мне шкада тых, хто не хоча разумець нашу мову
Старшыня Віцебскага абласнога аддзялення ГА „Саюз беларускіх пісьменнікаў” штодня атрымлівае лісты з казкамі.
Да яе пішуць удзельнікі дзіцячага конкурсу “Казка – цудоўная краіна”, абвешчанага ўвесну абласной пісьменніцкай філіяй разам з тэатрам “Лялька” і віцебскімі курсамі “Мова нанова”. Працаў дасылаюць шмат, і таму конкурс вырашана працягнуць да канца лістапада. Сваю задачу конкурс выконвае, лічыць Настасся Лазебная:
– Мне вельмі хочацца далучыць дзетак да беларускай мовы, і галоўная ўмова конкурсу – каб пісалі па-беларуску. Ужо дасылаюць свае працы і 14-гадовыя, і 13-гадовыя, і гэта вельмі радуе: значыцца, ёсць у нас дзеткі, якія любяць мову! Адчуваецца часам, што і бацькі дапамагалі. І гэта няважна! Затое і бацькі трошкі падвучаць беларускую мову, і дзіця будзе адчуваць, якая яна прыгожая! Я шкадую тых людзей, якія мовы нашай не хочуць разумець і ведаць. Бо праз мову – уся культура наша. Ну як жа інакш!
Казкі – улюбёны жанр і самой пісьменніцы, якую чытачы ведаюць пад псеўданімам Стася Наркевіч. Неаднаразова яе творы выходзілі ў фармаце кніжак-размалёвак для самых маленькіх, а ілюстрацыі да апошняй сваёй кнігі “Прывідаў пярсцёнак” аўтарка намалявала сама.
Настасся Лазебная мае вялікі стаж у журналістыцы, і ўжо шосты год кіруе філіяй пісьменніцкага саюзу, які не надта шанаваны ўладамі. І нягледзячы на гэта, літаратары пішуць свае творы, выдаюць іх за ўласныя грошы, не чакаючы асаблівага спрыяння ці дапамогі. У Настассі Лазебнай увогуле ёсць ідэя, каб надрукаваць зборнікі казак ды распаўсюджваць іх бясплатна – каб яны сталі падтрымкай для дзетак з цяжкімі лёсамі. Бо казкі – гэта не проста прыдумкі, а парады, як быць шчаслівым.
Цалкам гутарку з Настассяй Лазебнай слухайце ў далучаным файле:
Ганна Ліпка, Беларускае Радыё Рацыя
Глядзіце таксама
