Вечарына ў гонар юбіляраў
Дзве гадзіны ў канферэнц-зале Берасцейскай гарадской бібліятэкі імя Пушкіна гучалі вершы, песні, музыка паэтаў-юбіляраў літаратурнага клуба “Літара”.
Выдзяляўся сярод пяці юбіляраў 80-гадовы Іван Мельнічук, літаратар з вялікім стажам, вершы якога ўвайшлі ў школьныя падручнікі як па беларускай літаратуры, так і па рускай. Многа добрых слоў, песень у яго гонар прагучала ў гэты вечар. Іван Мельнічук пачаў з кароткага цікавага жыццянарысу пра сябе:
– Нарадзіўся 15 верасня, а праз два дні прыйшлі немцы туды, дзе я нарадзіўся ў Польшчы. І два гады мы ведалі, што такое фашысты. Потым нас вывезлі ва Украіну. Мы ўжо зведалі там, што такое калгасы, а адтуль уцякалі.
Юбілярам клуба “Літара” ад 60 да 80. Іх даволі багаты жыццёвы вопыт і не менш багаты паэтычны і музычны набытак з задавальненнем слухалі ўдзельнікі вечарыны:
– Пушкін сказаў: “И чувства добрые я лирой пробуждал”. Так і гэтая сустрэча.
– Вечар быў неверагодны!
– Душа адпачыла.
– Каб больш было моладзі, каб больш яны гэта адчувалі, разумелі.
Удзельнікі паэтычнага вечара ўспомнілі і тысячагоддзе роднага горада, пазнаёміліся з кнігамі юбіляраў, якія былі на выставе.
Беларускае Радыё Рацыя
