Урад зацвердзіў аб’ёмы будаўніцтва жылля ў Беларусі ў 2020-2021 гадах
Урад зацвердзіў аб’ёмы будаўніцтва жылля ў Беларусі ў 2020-2021 гадах. Адпаведная пастанова Савета Міністраў ад 31 снежня 2019 года нумар 969 афіцыйна апублікавана сёння на Нацыянальным прававым інтэрнэт-партале.
Усяго ў 2020 годзе трэба ўвесці 4 млн кв.м жылля. З гэтага аб’ёму для тых, хто стаіць на ўліку маючых патрэбу ў паляпшэнні жыллёвых умоў і будуецца з дзяржпадтрымкай, прадугледжана 984,13 тыс. кв.м. У 2021 годзе хочуць увесці 3,5 млн кв.м жылля, у тым ліку для тых, хто мае патрэбу ў паляпшэнні жыллёвых умоў і будуецца з дзяржпадтрымкай, – 683,7 тыс. кв.м (пры ўмове наяўнасці крыніц фінансавання, у тым ліку крэдытаў).
План на 2020 год для Менскай вобласці – 1,12 млн кв.м, Берасцейскай – 650 тыс. кв.м, горада Менска – 630 тыс. кв.м, Гомельскай вобласці – 485 тыс. кв.м. У Гарадзенскай вобласці запланаваны ўвод 415 тыс. кв.м, у Магілёўскай – 365 тыс. кв.м, у Віцебскай – 335 тыс. кв.м. У I паўгоддзі трэба ўвесці не менш як 35 працэнтаў ад запланаванага, за 9 месяцаў – 65 працэнтаў.
Арэнднага жылля пабудуюць 135 тыс. кв.м, пры гэтым больш за ўсё ў Менскай вобласці – 30,5 тыс. кв.м і Менску – 22,3 тыс. кв.м.
У гарадах-спадарожніках плануецца пабудаваць жыллё амаль для тысячы чалавек. Амаль палавіна з іх атрымае кватэры ў Смалявічах. Па 100 чалавек палепшаць жыллёвыя ўмовы ў Жабінцы і Фаніпалі, крыху менш за сотню – у Лагойску, 80 – у Дзяржынску, 60 – у Скідзелі, 58 – у Рудзенску і 10 – у Заслаўі. Для гэтых мэт прадугледжаны крэдытныя рэсурсы банкаў у памеры Br43,32 млн.
Аб’ёмы фінансавання жылля для шматдзетных складуць Br929,19 млн. Увод жылля ў 2020 годзе плануецца для 10 154 шматдзетных сем’яў.
У цэлым крэдытныя рэсурсы банкаў, што накіроўваюцца ў 2020 годзе на фінансаванне жыллёвага будаўніцтва (без уліку затрат на інфраструктуру), складуць Br983,03 млн.
Пастановай таксама вызначана, што з 2020 года ўсе шматкватэрныя жылыя дамы будуць праектавацца і будавацца ў энергаэфектыўным выкананні.
Аблвыканкамам і Мінгарвыканкаму даручана стрымліваць рост кошту будаўніцтва жылля з дзяржпадтрымкай і за кошт бюджэтных сродкаў, забяспечыўшы выкарыстанне праектаў эканамічных жылых дамоў тыпавых спажывецкіх якасцей. Таксама неабходна аказваць садзейнічанне грамадзянам у будаўніцтве індывідуальнага жылля.
У кожнай вобласці і Менску трэба забяспечыць будаўніцтва шматкватэрных дамоў, дзе электраэнергія выкарыстоўваецца для мэт ацяплення, гарачага водазабеспячэння і прыгатавання ежы.
