Мінімальны тэрмін знаходжання ў ЛПП могуць павялічыць
Для грамадзян, якія накіроўваліся ў ЛПП тры і больш разоў, мінімальны тэрмін знаходжання ў такіх установах могуць павялічыць па рашэнні суда з аднаго года да двух.
Пра гэта расказаў БЕЛТА член Пастаяннай камісіі Палаты прадстаўнікоў па нацыянальнай бяспецы Аляксандр Данчанка.
Навацыя змяшчаецца ў змене ў закон „Аб парадку і ўмовах накіравання грамадзян у лячэбна-працоўныя прафілакторыі і ўмовах знаходжання ў іх”. Папраўкі дэпутацкі корпус плануе разгледзець у першым чытанні ўжо на маючай адбыцца вясенняй сесіі.
Парламентарый нагадаў, што ў ЛПП накіроўваюцца працаздольныя грамадзяне, хворыя на хранічны алкагалізм, наркаманію або таксікаманію, якія сістэматычна прыцягваюцца да адміністрацыйнай адказнасці за ўчыненне правапарушэнняў у стане ап’янення або пад уздзеяннем наркатычных сродкаў, псіхатропаў, таксічных або іншых адурманьваючых прэпаратаў. „У гэтых устаноў змяшчаюць непрацуючых і працаздольных, тых, хто вядзе асацыяльны лад жыцця і над якімі ўстаноўлены прэвентыўны нагляд альбо прафілактычнае назіранне. Нашы людзі ўжо адвыклі ад таго, што нехта ідзе па вуліцы і на хаду п’е піва, а часам яшчэ робіць гэта і ля дзіцячых пляцовак. Сустракаючыся з выбаршчыкамі, адзначаю, што ў грамадства ёсць патрэба навесці больш дакладны парадак у дадзенай заканадаўчай сферы „, – дадаў Аляксандр Данчанка.
Праект закона таксама прадугледжвае дзяленне ЛПП на два віды ў залежнасці ад умоў прымусовай ізаляцыі. Першы тычыцца грамадзян, якія ўпершыню накіроўваюцца ў гэтыя ўстановы. Там прапануецца стварыць лакальныя ўчасткі для ўтрымання спецкантынгента з высокім роўнем рэабілітацыйнага патэнцыялу і магчымасцю скарачэння іх тэрміну знаходжання ў лячэбна-працоўным прафілакторыі.
Другі від прызначаны для асоб, якія раней былі судзімыя, а таксама накіраваных у ЛПП другі і наступныя разы. Для іх плануецца рэгламентаваць скарачэнне працягласці асабістага часу з трох да адной гадзіны і памяншэнне жылой плошчы на аднаго чалавека ў спальным памяшканні з 2,5 да 2 кв.м. Акрамя таго, для іх могуць змяніць колькасць дазволеных да атрымання пасылак, перадач, бандэроляў і дробных пакетаў.
