У Косаве ўшанавалі Тадэвуша Касцюшку
У Косаве адбылося чарговае ўшанаванне ўгодкаў з дня народзінаў Тадэвуша Касцюшкі. Сабралася шмат гасцей – дыпламаты, прадстаўнікі мясцовых уладаў, дэмакратычнай грамадскасці і мясцовыя жыхары.
На пачатку мерапрыемства прысутныя ўсклалі кветкі да мемарыяльнага каменю з шыльдай Тадэвушу Касцюшку.
Потым адбылася экскурсія ў музеі, дзе грала музыка часоў Касцюшкі. Прысутныя паслухалі выступы гасцей. Замежныя госці падарылі рэчы ў музей, якія тычыліся жыцця і прамяці Тадэвуша Касцюшкі.
Для мясцовых жыхароў – гэта месца святое, кажа 86-гадовая касаўчанка:
– Я ж помню як першы раз сабраліся пад бел-чырвона-белымі сцягамі. Гэта быў 1996 год. Тут яшчэ нічога не было. Усё было зруйнавана. Было столькі народу!
Замежныя дыпламаты таксама выказалі цёплыя пачуцці ў адрас Тадэвуша Касцюшкі.
Кажа Скот Роланд – павераны ў справах Злучаных Штатаў Амерыкі амбасады ЗША ў Беларусі:
– Для амерыканцаў – гэта і наш герой. Мы сёння маем адмысловы падарунак – гэта уніформа кадэта Ваеннай акадэміі Вэст-Пойнта. Касцюшка зрабіў вельмі шмат, каб заснаваць у нас гэтую акадэмію і дапамагчы нам у нашай вайне за Незалежнасць.
Альда де Лука: Я – кіраўнік дыпламатычнай місіі Швейцарыі. Мы ў сваёй краіне шануем памяць пра Тадэвуша Касцюшку, таму што гэты чалавек вельмі шмат зрабіў для распаўсюду ідэй свабоды.
Мерапрыемства адбылося без эксцэсаў, нягледзячы на тое, што актывісты разгортвалі бел-чырвона-белыя сцягі.
Напрыканцы імпрэзы баранавіцкі прадпрымальнік Мікола Чарнавус пачаставаў прысутных “паўстанцкай кашай”.
[Not a valid template]
Беларускае Радыё Рацыя, Косава
