Спецыялісты вывучаць пытанні паставак нафты з партоў па трубе
Спецыялісты гатовы за кароткі тэрмін вывучыць і прапрацаваць пытанні па аднаўленні трубаправодных паставак нафты з балтыйскіх партоў у Беларусь. Такая дамоўленасць дасягнутая 4 сакавіка ў час міжнароднага экспертнага семінара ў Беларускім інстытуце стратэгічных даследаванняў (БІСД).
Семінар праводзіўся ў фармаце chatham house. Дасягнута дамоўленасць адпрацаваць на ўзроўні спецыялістаў усе пытанні. Яны датычацца вызначэння найбольш аптымальнага як з пункту гледжання кошту, так і часавых затрат шляху аднаўлення працаздольнасці трубаправоднай сістэмы, што дазваляе дастаўляць нафту з балтыйскіх партоў у Беларусь. У бліжэйшы час будзе створана рабочая група па двух напрамках, тэхнічным і юрыдычным, каб на базе атрыманай тэхнічнай інфармацыі падрыхтаваць пагадненне і выйсці на міжурадавы ўзровень. Удзельнікі семінара выказалі гатовасць прапрацоўваць напрамкі супрацоўніцтва, каб забяспечыць дыверсіфікацыю паставак энергарэсурсаў у Беларусь. Падкрэслівалася зацікаўленасць у гэтым трох бакоў – Беларусі, Латвіі і Літвы.
Удзел у семінары прынялі прадстаўнікі латвійскіх і літоўскіх чыгунак, нафтаперавалачных, лагістычных кампаній, партоў, дыпламаты. Беларускі бок прадставілі кіраўніцтва і эксперты канцэрна «Белнафтахім», Беларускай чыгункі, Асацыяцыі еўрапейскага бізнесу. Яны абмеркавалі сярод іншага асаблівасці бягучай кан’юнктуры сусветнага рынку вуглевадародаў і прагнозы развіцця на бліжэйшы час і сярэднетэрміновую перспектыву. Разглядаліся таксама тэхнічныя магчымасці, канкурэнтныя перавагі і рызыкі пры арганізацыі паставак нафты ў Беларусь праз латвійскі і літоўскі транзітныя калідоры, магчымыя перспектыўныя сцэнарыі развіцця эфектыўнай нафтаперапрацоўкі ў Беларусі.
Дырэктар БІСД Алег Макараў, адкрываючы семінар, адзначыў, што мерапрыемства нацэлена на абмеркаванне з галіновымі экспертамі з Беларусі, Літвы і Латвіі іх бачання аптымальных опцый паставак альтэрнатыўнай нафты на беларускія НПЗ. Ён нагадаў, што напярэдадні на нарадзе па пытаннях забеспячэння эфектыўнай работы нафтаперапрацоўчага комплексу краіны ў 2020 годзе і на перспектыву Прэзідэнт паставіў шэраг задач па дыверсіфікацыі паставак нафты і па выбудоўванні лагістыкі дастаўкі сыравіны. «Наш інтарэс заключаецца ў тым, каб вывучыць сітуацыю і сфармаваць зразумелую на перспектыву пазіцыю», – сказаў дырэктар БІСД. Інстытут, паводле слоў Алега Макарава, у рамках сваёй кампетэнцыі імкнецца трымаць руку на пульсе ключавых пытанняў развіцця дзяржавы ў мэтах інфармацыйна-аналітычнага забеспячэння Прэзідэнта і іншых вышэйшых службовых асоб па стратэгічных аспектах знешняй і ўнутранай палітыкі. Ва ўзаемадзеянні з партнёрскімі структурамі БІСД прадоўжыць маніторынг актуальных пытанняў дыверсіфікацыі крыніц і лагістыкі паставак вуглевадароднай сыравіны ў кантэксце забеспячэння энергетычнай бяспекі краіны.
Глядзіце таксама
