Другая партыя танкернай нафты пачала паступаць на «Нафтан»
«Нафтан» пачаў прымаць на перапрацоўку танкерную нафту, пастаўленую праз Клайпеду.
Уся другая партыя – 160 тыс. т расейскай нафты, закупленай праз трэйдараў без прэміі, – будзе пастаўлена на прадпрыемства ў сакавіку. Пра гэта паведаміў 7 сакавіка журналістам генеральны дырэктар ААТ «Нафтан» Аляксандр Дзямідаў.
Сыравіна дастаўляецца чыгуначным транспартам. «Чарговы састаў прыбыў на наша прадпрыемства. Усё адбываецца вельмі дакладна і аператыўна дзякуючы сумесным дзеянням беларускай і літоўскай чыгунак, мытных органаў», – сказаў гендырэктар «Нафтана». Ён падзякаваў усім ведамствам і чыгуначным прадпрыемствы за высокі ўзровень арганізацыі працы.
Аляксандр Дзямідаў дадаў, што цяпер на прадпрыемстве праводзяцца стандартныя працэдуры. «Ідзе працэс зліву, паралельна праводзяцца аналізы па ўваходным кантролі якасці нафты, і адразу пасля гэтага яна будзе ўключацца ў перапрацоўку», – распавёў ён.
«Гэты працэс працягваецца. Усё ідзе ў штатным рэжыме», – падкрэсліў кіраўнік прадпрыемства.
Гэта другая ў гэтым годзе пастаўка танкернай сыравіны, даставілі сюды на «Нафтан» чыгуначным транспартам з порта Клайпеды. Першая адбылася ў студзені-лютым, тады прадпрыемства прыняло на перапрацоўку 86 тыс. т нарвежскай нафты гатунку Johan Sverdrup.
Акрамя таго, азербайджанская кампанія Socar паставіць яшчэ два танкеры нафты – каля 170 тыс. т. У Беларусь сыравіну будзе дастаўлена праз Украіну па нафтаправодзе Адэса – Броды. Socar плануе адправіць першы танкер з нафтай для Беларусі з турэцкага порта Джэйхан 5-6 сакавіка. Прыкладна 20 сакавіка плануецца другі танкер з грузінскага порта Супса.
Акрамя гэтага ў сакавіку нафту без прэміі будуць пастаўляць шэсць расейскіх кампаній, сярод якіх «Сафмар» і пяць новых для Беларусі пастаўшчыкоў. У прыватнасці, група кампаній «Сафмар» паставіць 300 тыс. т нафты, «УДС Нефть» – 50 тыс. т.
Агульны аб’ём паставак на беларускія НПЗ у сакавіку складзе каля 1 млн т нафты. У студзені і лютым заводы працавалі на загрузцы 50% і перапрацавалі каля 1,8 млн т нафты.
Паводле БелТА
Глядзіце таксама
