Пандэмія каронавірусу: сітуацыя на вечар 23 сакавіка
Штодзённа ў свеце працягвае расці колькасць людзей, якія заразіліся каронавірусам і колькасць памерлых у выніку заражэння.
Сітуацыя ў Італіі па-ранейшаму выглядае трагічна, за апошні дзень памёр 601 чалавек (гэта, аднак, менш на 50, чым за папярэднія суткі). Агульная колькасць ахвяр эпідэміі ў Італіі перавысіла ўжо 6 тысяч і зараз складае 6 077 чалавек. Вельмі небяспечнай застаецца сітуацыя і ў Іспаніі, дзе за суткі памерлі 435 чалавек (зноў больш, чым днём раней). У Кітаі яна стабілізавалася – за суткі памерлі 9 чалавек. У Паўднёвай Карэі і Японіі таксама пазітыўная дынаміка.
Колькасць інфікаваных COVID-19 на вечар 23 сакавіка па ўсім свеце складае 372 634 чалавекі. 101 373 чалавек вылечылася.
Усяго на планеце ўжо 26 краін, дзе колькасць захварэўшых перавысіла 1 тысячу чалавек. 23 сакавіка да гэтага пераліку дадаліся яшчэ тры краіны – Ізраіль, Турцыя, Ірляндыя.
Агульная колькасць ахвяраў каронавірусу ў свеце дасягнула 16 314 чалавек, за апошнія суткі памерла 1 676 чалавек (гэта зноў больш, чым за папярэдні дзень).
Найбольш памерлых за ўвесь час зафіксавана ў Італіі – 6 077 чалавек.
Далей у гэтай сумнай статыстыцы ідуць:
Кітай – 3 270
Іспанія – 2 207.
Іран – 1 812
Францыя – 860
ЗША – 504
Вялікабрытанія – 335
Нідэрлянды – 213
Германія – 118
Швайцарыя – 118
Паводле афіцыйных звестак сітуацыя ў суседніх з Беларуссю краінах наступная:
Польшча – 692 інфікаваных – 8 чалавек памерлі;
Расея – 438 – афіцыйна 1 смерць;
Латвія – 180 – смяротных выпадкаў не зафіксавана;
Літва – 160 – 1;
Украіна – 73 – памерлі 3 чалавекі.
Паводле апошніх звестак у Беларусі 81 інфікаваны, фактаў смерці афіцыйна не падавалася.
Беларускае Радыё Рацыя
