Праціўнікі будаўніцтва завода сабраліся ў Берасці
У Берасці на плошчы Леніна 29 сакавіка прыблізна апоўдні чарговы раз сабраліся праціўнікі будаўніцтва акумулятарнага завода. Такія сустрэчы праходзяць на гэтай пляцоўцы кожную нядзелю з 25 лютага 2018 года.
Паводле даных праваабаронцы Рамана Кісляка, у 12.40 на плошчы было больш за 160 чалавек. Міліцыя праз мегафон папярэджвала сабраных аб адказнасці за правядзенне несанкцыянаванай акцыі.
Улічваючы эпідэміялагічную сітуацыю, людзі разгрупаваліся невялікімі групамі па плошчы. Многія прыйшлі на сустрэчу ў масках.
Прысутныя на плошчы абмяркоўвалі сітуацыю з правядзеннем дзяржаўнай экалагічнай экспертызы праектнай дакументацыі акумулятарнага завода ТАА „АйПаўэр”.
Як паведаміла прэс-служба Групы кампаній 1AK-GROUP, у якую ўваходзіць „АйПаўэр”, 24 лютага праектная дакументацыя акумулятарнага завода пасля карэкціроўкі была пададзена на дзяржаўную экалагічную экспертызу (ГЭЭ). 24 сакавіка прэс-служба 1AK-GROUP паведаміла, што Цэнтр экалагічных экспертыз ацаніў разлікі, прыведзеныя ў праекце, як празмерныя, выкананыя з вялікім запасам. ТАА „НПФ „Экалогія”, якое з’яўляецца генеральным праекціроўшчыкам, адклікала пакет дакументаў, выканала дапрацоўку і падало іх у Рэспубліканскі цэнтр дзяржаўнай экалагічнай экспертызы і павышэння кваліфікацыі кіруючых работнікаў і спецыялістаў Мінпрыроды.
Як заявіў Канстанцін Астапук, „усё гэта нагадвае цырк”. „Колькі ўжо можна падаваць дакументы на дзяржаўную экалагічную экспертызу?” — заявіў ён.
Актывіст Дзімітрый Андрасюк адзначыў, што „дзівіцца няма чаму”. „За гэтыя два гады „АйПаўэр” цалкам дыскрэдытаваў сябе”, — лічыць ён.
На думку актывіста Алега Вялава, „хутчэй за ўсё „АйПаўэр” сказалі, што па гэтых дакументах не можа быць станоўчага заключэння дзяржаўнай экалагічнай экспертызы”. „Цяпер яны чарговы раз нешта перадалі і спрабуюць „уцюхаць „гэты праект на дзяржаўную экалагічную экспертызу”, — лічыць ён.
Пасля сустрэчы на плошчы, якая працягвалася прыкладна да 12.40, праціўнікі будаўніцтва завода прайшлі па цэнтральных вуліцах Берасця — Пушкінскай і Савецкай да кінатэатра „Беларусь”.
Акумулятарны завод ТАА „АйПаўэр” пабудаваны на прамысловай пляцоўцы „Аэрапорт” у СЭЗ „Берасце”. На прадпрыемстве плануецца наладзіць поўны цыкл вытворчасці свінцова-кіслотных акумулятарных батарэй. Жыхары Берасця і Берасцейскага раёна лічаць, што прадпрыемства пагражае іх здароўю. Актывісты выявілі шэраг парушэнняў пры рэалізацыі праекта.
У чэрвені 2019 года Берасцейскі аблвыканкам прыпыніў будаўніцтва завода „да ліквідацыі выяўленых парушэнняў”, а абласны камітэт прыродных рэсурсаў і аховы навакольнага асяроддзя прыпыніў дазвол прадпрыемству на выкід забруджвальных рэчываў у атмасферу.
У ліпені праект акумулятарнага завода атрымаў адмоўнае заключэнне дзяржаўнай экалагічнай экспертызы. У Мінпрыроды паведамілі, што прычынай стала даванне недакладных звестак.
У жніўні праектная дакументацыя акумулятарнага завода была паўторна пададзена на дзяржаўную экалагічную экспертызу.
У верасні стала вядома, што кампанія адклікала праектную дакументацыю акумулятарнага завода з дзяржаўнай экалагічнай экспертызы „па прычыне неабходнасці ўсебаковага і больш поўнага адлюстравання інфармацыі аб унесеных змяненнях”.
У верасні Аляксандр Лукашэнка ў час наведвання Берасцейскай крэпасці заявіў, што ён „на баку людзей”, якія занепакоеныя праблемамі, звязанымі з уводам у эксплуатацыю акумулятарнага завода. Паводле слоў Лукашэнкі, неабходна даць мясцовым жыхарам права правесці экспертызу будаўніцтва прадпрыемства. „Толькі яны будуць вырашаць, ці быць гэтаму заводу і якім будзе гэты завод”, — падкрэсліў ён.
Глядзіце таксама
