Віцебскую блогерку Вольгу Жураўскую аштрафавалі і затрымалі
У віцебскім судзе Кастрычніцкага раёна стваральніцу відэаблога „Снимать разрешено” прызналі вінаватай за хуліганства – за тое, што яна здымала, як бяруць тэсты на каронавірус у віцебскім супрацьсухотным дыспансеры, а пазней выклала відэаролік у інтэрнэт.
Паводле артыкула 17.1 КоАП суддзя Уладзімір Царыкаў аштрафаваў яе на 30 базавых велічынь (810 рублёў). Заяву ў міліцыю на Вольгу Жураўскую напісаў лекар, які праводзіў прыём.
Блогерка тлумачыла ў судзе, што прывяла на аналіз свайго сына, які кепска сябе адчуваў, а ў нядаўнім мінулым кантактаваў з хворым. І здымала яна найперш свайго сына, але – з інфармацыйнымі мэтамі, тлумачыць Алена Янушкоўская, таксама віцебская блогерка, якая была на судовым працэсе:
– Па паказаннях вяла туды хлопца свайго, і паколькі ў нас няма інфармацыі пра каронавірус у краіне, яна хацела зняць, як адбываецца прыём, як праводзяць аналіз. Каб данесці інфармацыю, запытацца ў лекара, што да чаго, што рабіць, што трэба…
З самой Вольгай Жураўскай звязацца па сканчэнні суду не ўдалося. У 12.01 у Telegram-канале “Витебск Для Жизни Chat” яна паведаміла, што каля дома яе перастрэлі і затрымалі супрацоўнікі міліцыі. “Батарэя амаль што села, я без сувязі”, – напісала блогерка. У 15.30 па тэлефоне яна ўсё яшчэ была недаступная.
Беларускае Радыё Рацыя, Віцебск
Глядзіце таксама
