Сюрпрызы Сяргея Ціханоўскага
Выглядае на тое, што ў беларускую палітыку вярнулася інтрыга, якая амаль паспела знікнуць пасля сыходу Паўла Севярынца з праймерыз. Гэтым разам у перадвыбарчую гульню ўварваўся цяжкавагавік з 90 тысячамі падпісчыкаў на ютуб-канале “Краіна для жыцця” Сяргей Ціханоўскі. Гэты блогер за няпоўны год змог напрацаваць вялікую аўдыторыю і стаць адным з найбольш пазнавальных апазіцыянераў. Трэба сказаць, што ягоны паход у вялікую палітыку можа стаць непрыемным сюрпрызам не толькі для канкурэнтаў з апазіцыйнага лагеру, але і для ўладаў.
Гамяльчук Сяргей Ціханоўскі ўвайшоў у медыйную сферу вельмі імкліва. Спачатку ён быў героем аднаго з журналісцкіх матэрыялаў на сацыяльную тэматыку. Паводле падзабытага сюжэту, ён як бізнесовец імкнуўся надаць другое жыццё былому купецкаму дому ХІХ ст. у вёсцы Агародня-Гомельская Добрушскага раёна. Але ягоныя мары пра агратурызм былі перакрэсленыя самадурствам мясцовых чыноўнікаў. Матэрыял атрымаўся рэзанансным, а Сяргей Ціханоўскі з прадпрымальніка раптам перакваліфікаваўся ў відэаблогеры. Неўзабаве ў Гомелі многія сталі пазнаваць гэтага чалавека на белым BMW з расейскімі нумарамі, які кідаўся асвятляць любую гарачую тэму. Калегі па блогерскім цэху і журналісты паставіліся да гэтага чалавека з падазрэннем, паколькі ён з нуля змог стварыць і раскруціць папулярны ютуб-канал. Цікава, што паступова канал блогера стаў запаўняцца палітычнымі відэасюжэтамі, стрымамі і размовамі з вядучымі беларускімі апазіцыйнымі палітыкамі. Якасны гук і карцінка, распаўсюд тавараў з лагатыпам канала, а таксама пераборлівы падыход што да гасцей эфіраў зрабілі з Ціханоўскага аднаго з самых вядомых палітычных блогераў у Беларусі. Што цікава, з кожным стрымам чалавек з невыразнай ідэнтычнасцю і размытай палітычнай ідэалогіяй эвалюцыянаваў у бок беларускага патрыёта. Прынамсі, старанна дэманстраваў такую эвалюцыю.
Уся блогерская дзейнасць Ціханоўскага — прыклад вельмі прадуманай палітычнай кампаніі, якая не мае на мэце дзяжурнае адбыванне нумару. Чаго вартыя нават назва ягонага каналу “Краіна для жыцця”, лагатыпы, акцыі, прасоўванне вобразу клапатлівага і гаспадарлівага чалавека, які ўмее лічыць грошы і ведае, куды рухацца краіне. Ціханоўскі адзначыўся і правядзеннем аднаго з масавых мітынгаў у Гомелі падчас прамінулых парламенцкіх выбараў. Ён увесь час крэатывіць з формамі афлайнавай дзейнасці. Згадайма ягоныя прагулкі па набярэжнай Сажа ў Гомелі па нядзелях, спробу запусціць флэшмоб “STOP 12”, а таксама вандроўную тэлестудыю на колах, якая гэтымі днямі здзяйсняе аўтапрабег па рэгіёнах Беларусі. І паўсюль ён сустракае ўдзячных падпісантаў, якія, акрамя агульнай незадаволенасці ўладамі, рэтранслююць жаданне бачыць Ціханоўскага прэзідэнтам. Такім чынам, заява пра ягоны паход у прэзідэнты была справай часу. І гэта здарылася. Блогер заявіў, што гатовы стаць адным з кандыдатаў пратэсту, то бок удзельнічаць у кампаніі, прапанаванай палітыкам Міколам Статкевічам. Але нешта падказвае, што ўдзел Сяргея Ціханоўскага ў гэтым фармаце — гэта той выпадак, калі маштаб асобы і амбіцыі акцёра выходзяць за межы задумы рэжысёра. У выніку можа здарыцца так, што менавіта “дублёр” Ціханоўскі стане тым самым кандыдатам пратэсту, за якім пойдуць незадаволеныя ўладай беларусы.