У Беларусі на падтрымку эканомікі плануецца накіраваць Br110 млн
У Беларусі на падтрымку эканомікі з-за каронавірусу плануецца накіраваць амаль Br110 млн. Пра гэта паведаміў сёння, 2 красавіка, журналістам прэм’ер-міністр Сяргей Румас.
Комплекс мер па падтрымцы эканомікі ўнесены на разгляд кіраўніка дзяржавы. «Цяжка падлічыць усе меры. Магу толькі сказаць, што прамыя меры бюджэтна-падатковай падтрымкі складуць амаль Br110 млн», – праінфармаваў прэмʼер-міністр.
Прапанаваны пакет мер ён назваў неардынарным. «Ён прадугледжвае падтрымку цэлых сектараў, у якіх працуюць 550 тыс. чалавек», – адзначыў прэмʼер.
Комплекс мер складаецца з пяці пакетаў. «Там ёсць шэраг мер у сферы грашова-крэдытнай і прудэнцыяльнай палітыкі, падтрымка рэальнага сектара эканомікі, па абароне спажывецкага рынку», – расказаў Сяргей Румас. Прапануецца таксама пакет мер, які дасць магчымасць ініцыяваць прыняцце рашэнняў у ЕАЭС.
Урад прыняў ужо шэраг неабходных пастаноў. «Усе астатнія пастановы, якія выкладзены ў гэтым пакеце мер, будуць прыняты сёння да канца дня. Яны ўжо распрацаваны, праходзяць працэдуру ўзгаднення», – дадаў прэмʼер.
Сяргей Румас нагадаў, што Прэзідэнт уважліва ставіцца да прапаноў аб аказанні мер дзяржпадтрымкі. «Таму кіраўнік дзяржавы накіраваў гэты комплекс мер для заключэння ў іншыя дзяржорганы. Урад чакае, што калегі з Адміністрацыі Прэзідэнта, Камітэта дзяржкантролю падзяляюць нашы падыходы аб неабходнасці аказання гэтай дзяржпадтрымкі і ў бліжэйшы час унясуць кіраўніку дзяржавы свае заключэнні», – сказаў кіраўнік урада.
Чакаецца, што пакет мер будзе прыняты ў бліжэйшы час.
Глядзіце таксама
