У Менскай епархіі не бачаць падстаў для закрыцця храмаў
2 красавіка адбылося пашыранае пасяджэнне епархіяльнага савета Менскай епархіі пад старшынствам мітрапаліта Менскага і Заслаўскага Паўла, патрыяршага экзарха ўсяе Беларусі, паведамляе church.by.
Галоўным пытаннем парадку дня стала абмеркаванне праблемы распаўсюджвання каронавіруснай інфекцыі ў сучасным свеце і неабходнасць прыняцця ў межах Менскай епархіі адпаведных мер па ахаванні веруючых людзей ад эпідэміі.
У якасці запрошанага эксперта ў пасяджэнні прыняла ўдзел намеснік міністра аховы здароўя Рэспублікі Беларусь Алена Богдан.
Алена Богдан пазнаёміла свяшчэннаслужыцеляў з навуковай інфармацыяй пра каронавірусную інфекцыю, паведаміла пра стан спраў, звязаных з захворваннямі ў Рэспубліцы Беларусь, і распавяла, што неабходна рабіць і як варта сябе паводзіць у барацьбе з распаўсюджваннем інфекцыі.
Удзельнікі пасяджэння аднадушна пацвердзілі, што пры цяперашняй эпідэміялагічнай абстаноўцы ў Рэспубліцы Беларусь няма падстаў для закрыцця храмаў і спынення грамадскіх богаслужэнняў, аднак, неабходна строга прытрымлівацца санітарных нормаў, рэкамендаваных Міністэрствам аховы здароўя, улічваючы пры гэтым і кіруючыся ў богаслужэбнай практыцы інструкцыяй, зацверджанай Свяшчэнным Сінодам Рускай Праваслаўнай Царквы ад 17 сакавіка 2020 года.
У сувязі з вышэйпададзеным, Епархіяльны савет пастанавіў:
1. Стварыць працоўную групу пад кіраўніцтвам протаіерэя Кірыла Шолкава, старшыні Сінадальнага аддзела па царкоўнай дабрачыннасці і сацыяльнаму служэнню Беларускай Праваслаўнай Царквы, якой даручыць прапрацаваць варыянты магчымага прычашчэння Святых Таін Цела і Крыві Хрыстовых людзей, хворых каронавірусам і змешчаных у ізаляваных памяшканнях на стацыянарным лячэнні.
2. Штодня, пачынаючы з 4 красавіка аж да завяршэння эпідэміі, ва ўсіх храмах Менскай епархіі здзяйсняць звон па наступным распарадку дня: у 9:00, 12:00, 15:00 і 18:00 гадзін здзяйсняць 12 удараў у вялікі звон, пасля якіх на працягу 10 хвілін ажыццяўляць перазвон ва ўсе званы.
Падчас здзяйснення звону святары ва ўсіх храмах ўзносяць малітву аб спыненні каронавіруснай інфекцыі, а ўсе вернікі, якія знаходзяцца ў сваіх дамах і кватэрах, заклікаюцца да малітвы аб дараванні нам міласці Божай і больш хуткім спыненні хваробы.
Таксама ў бліжэйшы час духавенства Менскай епархіі будзе накіравана цыркулярны ліст з пералікам мер, якія належыць здзяйсняць з мэтай процідзеяння распаўсюджванню каронавіруснай інфекцыі.
