Гародня: валанцёры дапамагаюць медыкам
У Гародні створана адзіная база дапамогі медыкам, што працуюць з хворымі на каронавірус і сталым людзям, што знаходзяцца ў самаізаляцыі ці каранціне з-за каронавіруса.
Пра працу валанцёраў распавядае адзін з каардынатараў валанцёрскага руху ў Гародні Вадзім Саранчукоў:
– Зараз мы аб’ядноўваем каманду валанцёраў для працы ў горадзе. Запушчаны тэлеграм-чат для камунікацыі, для збора інфармацыі, каму што трэба і хто можа дапамагчы. Заснаваныя два тэлефонныя нумары, бо адна з асноўных груп рызыкі – гэта людзі сталага ўзросту. І мы будзем прапаноўваць ім заставацца ў хаце. І запрашаем валанцёраў далучыцца да дапамогі дастаўкі ім харчавання з крамаў.
На думку Вадзіма Саранчукова, медыкі павінны і самі агучваць свае патрэбы:
– Ёсць цэнтральная база валанцёраў, якая збіраецца па ўсёй Беларусі. Да той базы мы таксама маем доступ і да тых людзей, якія зарэгістраваліся і прапаноўваюць сваю дапамогу. Асобна мы звяртаемся да медыкаў, каб яны не хавалі тых патрэбаў, якія ёсць у іх. Бо магчымасці ёсць розныя і рэсурсы збіраюць па ўсёй краіне.
Больш падрабязную інфармацыю пра валанцёрскі рух і патрэбы медыкаў ад сёння можна атрымаць на адмысловай старонцы ў сусветным павуцінні https://bycovid19.com/.
Беларускае Радыё Рацыя, Гародня
