Навучальны працэс у школах пачнецца з наступнага тыдня?
Лукашэнка заявіў 17 красавіка, падчас рабочай паездкі ў Лідскі раён Гарадзенскай вобласці, аб неабходнасці пачынаць навучальны працэс у школах з наступнага тыдня.
«Трэба акуратна глядзець за людзьмі і наконт адукацыі, школ і іншага, трэба пачынаць вучыцца. Але павольна, спакойна. У вёсцы няма праблем (ну і трэба ж разумець, што мы дзетак кормім і ўсе на пасяўной, куды дзяваць дзяцей). І праблем там няма. ВРВІ ўжо скончыліся», – сказаў кіраўнік дзяржавы.
«Таму могуць недзе займацца – няхай займаюцца. Калі ў горадзе, то тыдзень павінен пайсці на павольнае ўцягванне дзяцей да канца тыдня пасля Вялікадня ў адукацыйны працэс. Трэба паступова пачынаць вучыцца. А той тыдзень хто індывідуальна, хто ў школу прыйдзе… Але трэба раскручваць гэты працэс», – лічыць кіраўнік Беларусі.
Школьныя канікулы ў Беларусі прадаўжаліся двойчы – кожны раз на тыдзень. У пачатку красавіка міністр адукацыі Ігар Карпенка далажыў кіраўніку дзяржавы аб сітуацыі, сабраўшы папярэдне меркаванні і звароты бацькоў вучняў. Пасля гэтага было прынята рашэнне прадоўжыць вясеннія канікулы з 6 па 11 красавіка ўключна. Затым яны былі прадоўжаны яшчэ на тыдзень.
«З улікам існуючай эпідэміялагічнай абстаноўкі, сезонным пад’ёмам захваральнасці на вострыя рэспіраторныя вірусныя інфекцыі, грып, іншыя інфекцыі і неабходнасцю стабілізацыі абстаноўкі кіраўніком дзяржавы падтрымана прапанова Мінадукацыі і Міністэрства аховы здароўя аб прадаўжэнні вясенніх канікулаў ва ўстановах агульнай сярэдняй адукацыі да 18 красавіка», – растлумачылі рашэнне ў Адміністрацыі прэзідэнта.
Адукацыйны працэс у чацвёртай чвэрці будзе ажыццяўляцца з 20 красавіка па 30 мая. Міністэрства адукацыі павінна было скарэктаваць вучэбныя праграмы і каляндарна-тэматычнае планаванне па кожным вучэбным прадмеце за кошт падтрымліваючых і стымулюючых заняткаў.
Глядзіце таксама
