У Беларусі больш за 14 тыс пацверджаных выпадкаў COVID-19
Колькасць пацверджаных выпадкаў каронавіруснай інфекцыі COVID-19 у Беларусі дасягнула 14.027 (7,9% ад агульнай колькасці праведзеных тэстаў), памерлі 89 чалавек, паведаміла Міністэрства аховы здароўя ў сваім тэлеграм-канале.
Такім чынам, за апошнія суткі памерла яшчэ пяць чалавек, а агульная колькасць пацверджаных выпадкаў COVID-19 павялічылася на 846 (+6%). Міністэрства аховы здароўя традыцыйна падкрэслівае, што памерлі 89 пацыентаў „з шэрагам хранічных захворванняў з выяўленай каранавіруснай інфекцыяй”.
Паправіліся і былі выпісаныя 2.386 пацыентаў (+314 за суткі). Усяго праведзена 176.625 тэстаў на каронавірус.
Міністэрства аховы здароўя зноў не апублікаваў статыстыку захварэлых па абласцях і Менску, а таксама колькасць хворых, якія знаходзяцца на апаратах штучнай вентыляцыі лёгкіх, і пацыентаў, што маюць патрэбу „ў асаблівай увазе спецыялістаў у сувязі з цяжарам захворвання”. Прэс-мерапрыемстваў на гэтым тыдні Міністэрства аховы здароўя не праводзіла.
3 красавіка на прэс-канферэнцыі намеснік міністра аховы здароўя Алена Богдан заявіла, што прынятыя ў Беларусі меры далі магчымасць прадухіліць сотні выпадкаў захворвання каранавіруснай інфекцыяй штодня. „Калі б не меры, прынятыя па пошуку пацыентаў з каранавірусам, іх кантактаў, а таксама па іх шпіталізацыі і правядзенні супрацьэпідэмічных мерапрыемстваў на ўсёй тэрыторыі краіны, то сёння мы б мелі 840 выпадкаў за дзень і нічым бы не адрозніваліся ад найбліжэйшых дзяржаў. Ні адна суседняя краіна такія меры не прымала, не штіпалізаваліся ўсе выяўленыя кантакты першага ўзроўню, кантакты другога ўзроўню пры наяўнасці вострых рэспіраторных захворванняў”, — сказала Богдан.
14 красавіка яна дала прагноз, што рост колькасці пацверджаных выпадкаў каронавіруснай інфекцыі на 300—400 за суткі будзе доўжыцца яшчэ два-тры тыдні, пасля чаго пачнецца спад.
На брыфінгу 24 красавіка Богдан заявіла, што сітуацыя па-ранейшаму застаецца кантраляванай. Паводле яе слоў, у 85—87% выпадкаў захворванне працякае ў бессімптомнай і лёгкай формах, пад асаблівым кантролем лекараў знаходзяцца 114 пацыентаў, частка з якіх падключаныя да апаратаў ШВЛ. Прадстаўнік Міністэрства аховы здароўя падкрэсліла, што ўсе пнеўманіі цяпер „расцэньваюцца як каронавірусныя”.
Фота: МН
