Колькасць пацверджаных выпадкаў COVID-19 у Беларусі перавысіла 33,3 тысячы
Колькасць пацверджаных выпадкаў каронавіруснай інфекцыі COVID-19 у Беларусі дасягнула 33.371, памерла 185 чалавек, паведамляе Міністэрства аховы здароўя ў сваім тэлеграм-канале.
Такім чынам, за апошнія суткі памерлі яшчэ шэсць чалавек, а агульная колькасць выпадкаў COVID-19 павялічылася на 945, або на 2,8% (у папярэднія суткі было 918 новых выпадкаў і чатыры смерці). Міністэрства аховы здароўя традыцыйна падкрэслівае, што пацыенты памерлі „з шэрагам хранічных захворванняў з выяўленай каранавіруснай інфекцыяй”.
Ачунялі і выпісаныя 12.057 пацыентаў (+642 за суткі). Усяго праведзена 403.236 тэстаў на каранавірус, у тым ліку за апошнія суткі — больш за 15,5 тыс. даследаванняў.
Міністэрства аховы здароўя зноў не апублікавала статыстыку хворых па абласцях і Менску, а таксама колькасць хворых, якія знаходзяцца на апаратах штучнай вентыляцыі лёгкіх, і пацыентаў, якія маюць патрэбу „ў асаблівай увазе спецыялістаў у сувязі з цяжарам захворвання”. Брыфінгі для журналістаў міністэрства не праводзіць ужо чацвёрты тыдзень.
Аляксандр Лукашэнка 21 мая падчас сустрэчы з міністрам аховы здароўя Уладзімірам Каранікам і памочнікам прэзідэнта Аляксандрам Касінцом заявіў, што эпідэміялагічнае становішча ў Беларусі паляпшаецца, але расслабляцца нельга.
„Я бачу інфармацыю, кантралюю, але ні ў якім разе нельга расслабляцца. Трэба да канца прайсці гэты шлях і даказаць усім, асабліва ў нас у краіне. Нам трэба змагацца за жыццё людзей. Трэба трымацца з усіх сіл і ратаваць людзей, таму што застанецца адзін паказчык — смяротнасць”, — цытуе Лукашэнку яго прэс-служба.
Кіраўнік дзяржавы ацаніў працу ўрачоў: „Трэба арыентаваць нашых урачоў. Яны малайцы, ды і Міністэрства аховы здароўя добра арганізуе гэтую працу. А галоўнае, што вы вывучаеце штодзённы вопыт. Хацелася б, каб вы вытрымалі гэта. Напэўна, пакуль мы канчаткова не адыдзем ад гэтага, месяц нам яшчэ давядзецца боўтацца. Вядома, не той узровень ужо, трошкі лягчэй стала, але не расслабляцца”.
Фота БелТА
