У Беларусі больш за 38 тыс пацверджаных выпадкаў COVID-19
Такім чынам, за апошнія суткі памерлі яшчэ чатыры чалавекі, а агульная колькасць выпадкаў COVID-19 павялічылася на 915, або на 2,4% (у папярэднія суткі было 946 новых выпадкаў і пяць смерцяў). Міністэрства аховы здароўя традыцыйна падкрэслівае, што памерлі пацыенты „з шэрагам хранічных захворванняў з выяўленай каранавіруснай інфекцыяй”.
Паправіліся і выпісаныя 15.086 пацыентаў (+637 за суткі). Усяго праведзена 472.906 тэстаў на каронавірус, у тым ліку за апошнія суткі — амаль 10 тысяч.
Міністэрства аховы здароўя зноў не апублікавала статыстыку хворых па абласцях і Мінску, а таксама колькасць пацыентаў, якія знаходзяцца на апаратах штучнай вентыляцыі лёгкіх, і тых, якія маюць патрэбу „ў асаблівай увазе спецыялістаў у сувязі з цяжарам захворвання”.
25 мая Аляксандр Лукашэнка на нарадзе па сацыяльна-эканамічных і палітычных пытаннях расказаў пра сітуацыю з захворваннем на каранавірус у рэгіёнах. „Калі, я часта кажу гэта апошні месяц, і далей так пойдзе, то будзем лічыць, што мы справіліся з божай дапамогай з гэтым захворваннем”, — цытуе Лукашэнку яго прэс-служба.
„Пачалося гэта з Віцебска. Віцебск ужо канстатуе факт, што яны ўнізе па захворванні. Сведчаннем таго з’яўляецца, што мы бальніцы пачалі зачышчаць, вымываць — тыя, якія рыхтавалі як рэзерв для каранавіруса”, — заявіў афіцыйны лідар.
Паводле яго сцвярджэння, аналагічная сітуацыя назіраецца і ў Менску. „На плато ўжо знаходзімся, паводле заяў урачоў. Я, праўда, не такі аптымістычны з прычыны сваёй прымхлівасці”, — падкрэсліў Лукашэнка. Тым не менш, грунтуючыся на развіцці сітуацыі, ужо і ў Менску плануюць у найбліжэйшы час вяртаць да звычайнай працы шэраг лячэбных устаноў, у тым ліку анкалагічнага і гінекалагічнага профілю, бальніцу хуткай меддапамогі. „У прынцыпе, мы адчуваем, што нам ужо не спатрэбяцца гэтыя бальніцы ў Мінску (для лячэння хворых з каранавірусам. — БелаПАН.)”, — сказаў Лукашэнка.
Ён адзначыў „стабілізацыю захворвання і нават пэўнае зніжэнне” ў Менскай вобласці. Паводле слоў Лукашэнкі, нядрэнная сітуацыя і ў Магілёўскай вобласці. „Калі так, то ў нас застануцца толькі дзве вобласці — Брэсцкая і Гомельская, — якія мы павінны кантраляваць. Яны пазней за ўсіх увайшлі ў гэты працэс, і спецыялісты кажуць пра тое, што яны пазней за ўсіх і выйдуць, на тыдзень дзесьці”, — сказаў беларускі кіраўнік.
Паводле слоў Лукашэнкі, ён штодня раніцай і ўвечары цікавіцца адпаведнымі пытаннямі і праблемамі. „Ложкаў дастаткова. Цяжкіх менш стала. Мабыць, вірус усё-такі аслабеў ужо, вірулентнасць яго ўжо не тая. Дай бог, каб не тая, — заявіў ён. — Але пры гэтым мы павінны трымаць у галаве другую хвалю. Ніхто не даказаў, што яна будзе, але мы павінны да гэтага рыхтавацца. І ніхто не ведае, калі яна прыйдзе. Калі зімой і восенню, то дай бог, каб мы сур’ёзна змаглі падрыхтавацца да гэтага. А можа быць, гэтая бяда нас абміне. Тым не менш расслабляцца нельга”.
Фота Reuters
