Памідораў збіраў подпісы за Аляксандра Рыгоравіча
Вядомы беларускі музыка Аляксандр Памідораў збіраў у Гародні подпісы за Аляксандра Рыгоравіча Таболіча, вакаліста гурта „Зніч”.
Цягам некалькіх гадзін было сабрана амаль 200 подпісаў за музыку.
Аляксандр Памідораў падзяліўся сваімі ўражаннямі:
– Вельмі насцярожана людзі рэагуюць на сімбіёз імя і імя па бацьку Аляксандра Рыгоравіча. Пачынаецца палеміка: „Таболіч, а не будзе так, што збіралі за аднаго Рыгоравіча, а аддасі нашы подпісы іншаму?”. Кажа: „Не, усё сабе, усё сабе”.
Алесь Таболіч пракаментаваў затрыманне блогера Сяргея Ціханоўскага:
– Я канешне супраць усякіх такіх правакацый. Я кажу, што я за аб’яданне, а не раскол. Сваю ацэнку я зраблю трохі пазней, калі будзе зразумела, што тут адбывалася.
Напрыканцы збору подпісаў Аляксандр Памідораў выканаў некалькі сваіх вядомых песень, у тым ліку прагучала прэм’ера песні ў падтрымку збору подпісаў за Таболіча.
Беларускае Радыё Рацыя, Гародня
Фота Сяргея Апановіча
