У Скандынавіі выявілі перавышэнне канцэнтрацыі радыеактыўных ізатопаў у паветры
Станцыі сачэння за радыяцыйным становішчам на поўначы Еўропы выявілі перавышэнне канцэнтрацыі радыеактыўных ізатопаў у паветры.
Ёд-131 быў знойдзены ў пачатку чэрвеня ў Нарвегіі, а цэзій-134, цэзій-137, кобальт-60 і рутэній-103 – у Швецыі і Фінляндыі, паведамляе GreenPeace Russia са спасылкай на нацыянальныя ведамствы гэтых краін.
У Швецыі радыёнукліды выяўляліся па дадзеных на 22-23 чэрвеня, паведаміў выканаўчы сакратар Арганізацыі па дамове аб усёабдымнай забароне ядзерных выпрабаванняў Ласіна Зэрбо. Паводле яго слоў, канцэнтрацыя ізатопаў вышэй звычайнага ўзроўню, але не ўяўляе пагрозы для здароўя.
Нацыянальны інстытут здароўя і навакольнага асяроддзя Нідэрландаў прааналізаваў наяўныя дадзеныя і прыйшоў да высновы, што крыніцай радыеактыўнага воблака з’яўляюцца заходнія рэгіёны Расеі. Тую ж ацэнку пацвярджае і Зэрбо. У першую чаргу пад падазрэнне трапляе Кольская АЭС (з чатырма састарэлымі рэактарамі ВВЭР-440), а таксама базы атамных ледаколаў і атамных падводных лодак Паўночнага флота, размешчаныя на ўзбярэжжы Баранцава мора, піша GreenPeace. Расея на афіцыйным узроўні кажа, што нічога падобнага не здаралася.
Беларускае Радыё Рацыя
