Сяргею Ціханоўскаму прысудзілі 15 сутак (абноўлена)
У Гародні судзілі беларускага блогера, аўтара і вядучага канала „Страна для жизни” Сяргея Ціханоўскага. Ён быў затрыманы ў Гародні 29-га траўня ў выніку зладжанай правакацыі.
15 сутак адміністрацыйнага арышту прысудзіў суддзя Ленінскага раённага суда Юрый Казакевіч вядомаму блогеру Сяргею Ціханоўскаму. Увесь працэс праходзіў па Скайпу ў памяшканні абласнога суда. Сяргей Ціханоўскі знаходзіцца пад арыштам у ізалятары Следчага камітэта ў Менску. Па адміністрацыйнай справе яго вінавацяць нібыта ў непадпарадкаванні супрацоўнікам міліцыі. Прысутныя ў залі суда абураныя адсутнасцю сведкаў, апрача міліцыі:
– Цікавы лёс гэтага чалавека, бо калі яго арыштуюць, то можа быць, што сфабрыкуюць пад мяне справу. Пакуль на свабодзе. Гэта быў мірны пікет па зборы подпісаў і была жэстачайшая правакацыя, як я бачыў гэта збоку. Пасля мяне ўжо затрымалі і я не ведаў, што адбывалася.
– Адразу складаецца такое ўражанне, што гэта нагадвае якісьці злы цырк. Суддзя, які адкідае пытанні, якія напрасткі звязаныя з гэтай справай. Сведкі – гэта два міліцыянты, якія і ў пратаколах, і ў сваіх рапартах, усе іх паказанні супадаюць па літарах.
– Яны там, што ён супраціўляўся, бачыла, што ён ішоў. Ён крычаў, што правакацыя, было зразумела. Гэты міліцыянт упаў проста мне пад ногі, але ж я бачыла, што Ціханоўскі ўжо быў далёка. А гэта жанчына, якая хапала, вось дзе яна? Чаму яе няма на судзе? Яна ж гэта пачала.
Просьбу адваката Сяргея Ціханоўскага, пра закрыццё справы па прычыне недаказанасці яго віны, суддзя адхіліў.
Суд вядзе суддзя Ленінскага раённага суда Юрый Казакевіч, але суд праходзіць на выездзе ў абласным судзе Гародні. Разглядаецца адміністрацыйная справа паводле артыкулу 23.4 КаАП.
Яму закідаецца „непадпарадкаванне законным патрабаванням супрацоўнікаў міліцыі”. Абараняе Ціханоўскага гарадзенскі адвакат Андрэй Шчэпяткоў. Ціханоўскі на відэасувязі.
У працэсе быў 15-хвілінны перапынак для канфідэнцыйнай размовы гарадзенскага адваката Шчапяткова з падабаронным праз відэасувязь.
Пасля гэтага суддзя Юрый Казакевіч не задаволіў два хадайніцтвы Ціханоўскага і яго адваката. Ціханоўскага фактычна не азнаёмілі з матэрыяламі адміністрацыйнай справы, але ў справе ёсць даведка, што ён адмовіўся знаёміцца з пратаколам, Ціханоўскі заявіў, што гэта хлусня.
Другое хадайніцтва датычыла парадку разгляду справы, суддзя і яго адхіліў, пастанавіўшы, што спярша будзе апытанне сведак, потым прадстаўніка органа, які вядзе працэс, потым агалошванне пісьмовых матжрыялаў. На працэсе прысутнічае каля 45 чалавек.
На працэсе выявілася, што ў матэрыялах справы тры абсалютна ідэнтычныя дакументы, складзеныя міліцыяй у розныя дні(!), аднолькавыя ажно да граматычных памылак.
Ціханоўскі даў тлумачэнні, што дзеянні супрацоўнікаў АМАПу і гвалт былі неадэкватнымі, а ён нічога не парушаў. Адзначыў таксама шматлікія працэсуальныя парушэнні з боку міліцыі.
Суддзя Юрый Казакевіч засудзіў Сяргея Ціханоўскага па адміністрацыйнай справе да 15 сутак арышту.
Сяргей Ціханоўскі з’яўляецца кіраўніком ініцыятыўнай групы сваёй жонкі Святланы Ціханоўскай, якая падала дакументы ў Цэнтрвыбаркам, пакуль муж знаходзіўся за кратамі.
Беларускае Радыё Рацыя, Гародня
Фота Ладзіка Майніча і Якуба Сушчынскага
