Прыгадалі беларускага чыжыка
-Чыжык, чыжык, дзе ты быў?
-Я на Белай Русі жыў:
Бачыў слёзы, жалю крык,
Як гаруе там мужык…
Гэтымі радкамі слонімскага паэта Гальяша Леўчыка (1880-1944) пачалося літаратурнае мерапрыемства ў Азярніцкай сельскай бібліятэцы Слонімскага раёна.
Яно было прысвечана 140-годдзю паэта, празаіка, калекцыянера, перакладчыка, музыканта, мастака і фалькларыста Гальяша Леўчыка.
Мерапрыемства адкрыла загадчыца бібліятэкі Наталля Маразан, якая пазнаёміла прысутных з жыццёвым і творчым шляхам свайго земляка.
Пісьменнік са Слоніма Сяргей Чыгрын распавёў пра цікавыя, раней невядомыя, факты з жыцця Гальяша Леўчыка ў Слоніме і ў Варшаве, пра лёс яго жонкі Зосі Ляўковіч, пра тое, што калекцыяніраваў Гальяш Леўчык і якія каштоўныя рарытэты былі ў яго хатняй бібліятэцы. А былі там выданні: “Наша ніва”, “Гоман”, некалькі нумароў “Мужыцкай праўды”, кнігі Фрацішка Багушэвіча, выданні суполкі “Загляне сонца і ў наша ваконца”, кнігі Міхала Федароўскага з аўтографамі, партрэты пісьменнікаў, паштоўкі, карціны мастакоў, музычныя інструменты і г.д.
Мерапрыемства ў Азярніцкай сельскай бібліятэцы было аздоблена вершамі Гальяша Леўчыка і шчырымі песнямі, якія выканалі вясковыя жанчыны, не раўнадушныя да сваёй маленькай радзімы.
Аксана Шпак, Беларускае Радыё Рацыя, Слонімскі раён
Фота аўтара
