У Віцебску прыхільнікаў Аляксандра Лукашэнкі запрасілі на бясплатны канцэрт
Мітынгу, падобнага тым, што адбыліся ў іншых гарадах, у Віцебску не было: усе прамовы прагучалі ў Летнім амфітэатры – на галоўнай канцэртнай пляцоўцы горада.
За гадзіну да пачатку анансаванага канцэрта людзі пачалі збірацца на плошчы Леніна. Пад чырвона-зялёнымі сцягамі, а таксама пад сцягамі партыі “Белая Русь” і БРСМ сабралася каля паўтары тысячы чалавек. У бальшыні людзі прыйшлі паводле запрашэнняў кіраўніцтва па месцы працы, але былі і сапраўдныя прыхільнікі Аляксандра Лукашэнкі, якія прыйшлі добраахвотна. Свае погляды некаторыя дэманстравалі даволі агрэсіўна: нягледзячы на прысутнасць міліцыянтаў, спадарыня год 75-ці выбіла дыктафон з рук карэспандэнта тэлеканала “Белсат”, перад тым пагадзіўшыся адказаць на ягонае пытанне. Журналісты збіраюцца падаць заяву ў міліцыю.
Сабраўшыся на плошчы Леніна, людзі калонай рушылі ў цэнтр Віцебска. Але замест абяцанага канцэрта гледачоў чакала цэлая гадзіна прамоваў гарадскіх і абласных чыноўнікаў. Зрэшты, выступаючы каля мікрафона, яны не называлі сябе, а толькі распавядалі пра тое, што неабходна абараніць Беларусь ад знешніх, а галоўнае, унутраных пагрозаў.
Беларускае Радыё Рацыя, Віцебск
