У боегатовасць прыведзеныя тры ваенныя базы ў Гомелі, Менску і Менскай вобласці
У межах чарговага этапу праверкі боегатовасці Узброеных сіл Беларусі ў вышэйшую ступень баявой гатовасці прыведзеныя дзве артылерыйскія і адна танкавая база, паведамляе прэс-служба Міністэрства абароны.
Гаворка ідзе пра 1868-ю артылерыйскую базу ўзбраення (Гомель), 3620-ю артылерыйскую базу ўзбраення (Менск), 969-ю базу рэзерву танкаў (пасёлак Урэчча-2 у Любанскім раёне Менскай вобласці).
„Мерапрыемствы праверкі ўключаюць у сябе прызыў ваеннаабавязаных з запасу і баявое зладжванне падраздзяленняў, — адзначылі ў ваенным ведамстве. — Завершыцца праверка ўдзелам вайсковых часцей у камандна-штабным вучэнні з органамі ваеннага кіравання, воінскімі часцямі і арганізацыямі тэхнічнага забеспячэння”.
31 жніўня ў вышэйшую ступень баявой гатовасці ў межах праверкі была прыведзена 2766-я база гаручага (аграгарадок Чырвоны Бераг у Жлобінскім раёне Гомельскай вобласці).
Трэці этап комплекснай праверкі баявой гатовасці Узброеных сіл Беларусі праводзіцца з 24 жніўня па распараджэнні міністра абароны Віктара Хрэніна пад кіраўніцтвам начальніка Генштаба ВС — першага намесніка міністра абароны Аляксандра Вальфовіча.
Праверка праводзіцца для „ацэнкі здольнасці і гатовасці вайсковых часцей выканаць задачы па прызначэнні ў абстаноўцы, што дынамічна змяняецца, днём і ноччу, а таксама ўдасканаленне баявой вывучкі войскаў”.
Раней паведамлялася, што падчас праверкі „прадугледжваецца прывядзенне асобных вайсковых частак у вышэйшыя ступені баявой гатовасці з заклікам ваеннаслужачых з запасу”, а завершыцца яна „правядзеннем тактычнага вучэння”.
