У Менску адбыўся жаночы марш (абноўлена)
Некалькі дзяўчат, якія пайшлі ў метро на плошчу Перамогі, затрымалі. Сілавікі ўсаджвалі іх у мікрааўтобус з жоўтымі нумарамі, які выглядае, як звычайная маршрутка.
***
Дайшоўшы да скрыжавання праспекта Незалежнасці і вуліцы Казлова, дзяўчаты вырашылі разыходзіцца.
– Да заўтра, – сталі крычаць яны, праводзячы адзін аднаго.
***
У адным з дамоў калону вітае жанчына з сабачкай. Гаспадыня і сабака, упрыгожаны стужачкай, махаюць удзельніцам акцыі.
У нейкі момант жанчыны заўважылі ў калоне «ціхара».
– Хлопчык, які прыгожы хлопчык, – паспрабавала яго сфатаграфаваць адна з жанчын.
– Гюльчытай, пакажы тварык, не саромейся, – звярнулася да яго другая жанчына.
– Ганьба, пайшоў прэч, – сталі крычаць жанчыны. А потым сцягнулі з «ціхара» маску.
– У нас ціхарэса, – засмяяліся ўдзельніцы.
***
Аляксандр Лукашэнка ў гэтыя хвіліны праводзіць нараду з сілавікамі ў Палацы незалежнасці, паведамляе телеграм-канал «Пул першага».
***
Георгій Бабаян – карэспандэнт Russia Today, які цяпер працуе ў сталіцы. Удзельніцы маршу сустрэлі яго крыкамі «Ганьба!», У выніку мужчыну давялося перайсці на другі бок дарогі і адтуль назіраць за акцыяй.
***
Па дадзеных пазбаўленага рэгістрацыі праваабарончага цэнтра „Вясна”, сёння на жаночым маршы былі затрыманыя па меншай меры 31 чалавек.
***
Недалёка ад БНТУ удзельніцы жаночага маршу вырашылі перайсці дарогу. Не ўсе паспелі зрабіць гэта на зялёны сігнал святлафора, аднак калона працягвала рух па праезнай частцы. З аўтамабіля міліцыі жанчын папрасілі «не парушаць правілы дарожнага руху», а пасля гэтага машына пачала рух прама на людзей. Хуткасць была невялікай, аўтамабіль нікога не крануў, ніхто не пацярпеў.
***
Удзельнікі жаночага маршу частуюць адно аднаго яблыкамі і пончыкамі.
***
Удзельніцы жаночага маршу канчаткова аб’ядналі ўсе калоны з розных частак горада (але гэта зусім недакладна). Жанчыны ўжо прайшлі плошчу Якуба Коласа і рухаюцца ў бок Акадэміі Навук. Паводле розных ацэнак, у акцыі прымае ўдзел больш за 10 тысяч чалавек.
***
Жаночая калона рухаецца па праспекце Пераможцаў у бок Палацу спорту.
***
Ніна Багінская супраць аўтазакі. Жанчына не давала з’ехаць машыне з затрыманымі. Праз 30 секунд з аўтазака выйшлі 2 чалавекі ў форме міліцыі і адцягнулі жанчыну.
***
Бліжэй да 15.30 на другім баку ад Ратушы з’явілася яшчэ адна жаночая калона. Да яе далучыліся нешматлікія дзяўчыны, якія засталіся на плошчы Свабоды пасьля затрыманьня. Прагукаўшы: «Свабоду» і «Ганьба», удзельніцы акцыі накіраваліся ў бок Нямігі.
***
Так АМАП і невядомыя ў балаклаве і зялёнай вопратцы масава запіхвалі ў аўтазакі жанчын.
***
На плошчу Свабоды прыехалі аўтазакі і аўтобусы з людзьмі. З іх выйшлі супрацоўнікі АМАП і невядомыя ў балаклаве і зялёнай вопратцы. Яны спрабуюць узяць у кальцо тых, хто сабраўся жанчын і, здаецца, ўціснуць іх у летнюю тэрасу кафэ.
***
Некалькіх затрыманых жанчын адвялі ў мікрааўтобус. Іншыя удзельніцы мітынгу заблакавалі яго і не даюць праехаць.
***
На плошчы Свабоды працягваюцца. Некаторыя жанчыны спрабуюць сарваць балаклавы з невядомых у зялёных касцюмах.
Дзяўчыны крычаць, адну жанчыну штурхнулі, адна паднялася: «Нічога страшнага».
«Што вы робіце?», «Глядзіце не перастарайцеся» – крычаць людзям у форме жанчыны.
Некаторыя дзяўчаты спрабуюць схавацца ў кафэ.
***
У Ратушы з’явіліся людзі ў балаклаве. Яны затрымліваюць дзяўчат.
***
У апошні час суботы ў Менску – традыцыйна жаночы дзень. Сёння бліжэй да 15.00 у Ратушы сталі збірацца дзяўчыны.
Яшчэ раней побач з плошчай з’явілася некалькі мікрааўтобусаў і два міліцыянты. Яны падышлі да журналістаў і інтэлігентна папрасілі трымацца на бяспечнай адлегласці.
Як паведамляе наш карэспандэнт, удзельніц пакуль няшмат. Некаторыя з іх апранутыя ў белыя і чырвоныя рэчы. Сярод іх – Ніна Багінская традыцыйна з вялікім бел-чырвона-белым сцягам.
Прыкладна ў 14.50 да жанчын падышоў міліцыянт і стаў папярэджваць, што мерапрыемства несанкцыянаванае. На што дзяўчыны сталі адказваць: «Я гуляю».
***
Дзень горада адмянілі з-за эпідсітуацыі ў сувязі з COVID-19. Замест святкаванняў у дзень нараджэння сталіцы ўлады горада заклікалі народ прыняць удзел у суботніках.
Народ адгукнуўся. Сёння многія двары выйшлі акультурыць сваю тэрыторыю. Напрыклад на Гурскага.
tut.by
***
У Менску 12 верасня афіцыйна святкуюць Дзень гораду. Пройдуць суботнікі і кірмашы з садавінай і гароднінай.
Па абедзе чакаецца штосуботні жаночы марш супраць фальсіфікацыі выбараў, гвалту сілавікоў і затрыманняў мірных дэманстрантаў.
На гэтым тыдні сілавікі зноў пачалі затрымліваць жанчын на несанкцыянаваных пратэстах.
svaboda.org
Глядзіце таксама
