На гарадзенскім прадпрыемстве „Азот” АМАП учыніў гвалт (абноўлена)
У цэхах „Аміяк-3” і „Кабамід-4” дагэтуль працуе начаня змена – ужо больш 20 гадзін, а таксама кіраўнікі. Рабочыя, якія прыйшлі зранку адмаўляюцца заступаць на змену і чакаюць загаду спыніць вытворчасць.
У аўтобусе затрыманых на прадпрыемстве „Гродна-Азот” амонаўцы білі гумовымі палкамі і рукамі па твары. Бальшыню затрыманых пазней выпусцілі з РАУСу без складання пратаколаў.
***
Страйкоўцаў „Гродна-Азот” падтрымалі студэнты Гарадзенскага ўніверсітэту імя Янкі Купалы. Да „Азоту” прыязджала каля 12-й гадзіны калона салідарных таксістаў.
Генеральны дырэктар заводу спрачаўся з бастуючымі, але кіраўніку прадпрыемства так і не ўдалося ўгаварыць работнікаў цэху „Карбамід-4” перадаць змену.
Паводле сведчанняў людзей пры затрыманнях на „Гродна-Азот” карнікі вельмі жорстка затрымлівалі і збівалі людзей.
На прадпрыемстве „Гродна-Азот” з раніцы невядомыя вывесілі бел-чырвона-белы сцяг.
З раніцы 26 кастрычніка на гарадзенскім прадпрыемстве „Азот” АМАП учыніў гвалт. Каля 7 раніцы на праходнай прадпрыемства сабралася больш 100 рабочых. Побач дзяжурылі сілавікі ў чорным. Неўзабаве пачаўся хапун часткі рабочых, іншых амонаўцы пачалі заганяць на тэрыторыю.
Тым часам рабочыя пачалі спыняць тэхнічны працэс на заводзе.
Сілавікі затрымалі ледзь не палову трэцяй змены „цэху аміяку”. У выніку людзі сталі адмаўляцца прымаць змену ў гэтым цэху. Амонаўцы сталі сілай заганяць людзей на працу.
На тэрыторыі прадпрыемства з раніцы адключаны мабільны інтэрнэт.
Беларускае Радыё Рацыя
Фота: TUT.BY
