Наталля Радзіна: Эканамічныя абмежаванні – гэта тое, што вызваліць Беларусь ад фашызму
Рэдактарка сайту «Хартыя’97» піша, як раней дзейнічалі эканамічныя санкцыі (і нават пагроза іх прымянення) на рэжым Лукашэнкі, і заклікае ўрады краін пачынаць эканамічны ціск датычна кіраўніцтва Беларусі. Пра гэта яна выказалася ў рэдакцыйнай калонцы на сваім сайце.
Магчыма, у мяне хопіць слоў, але дакладна не хопіць сіл, каб апісаць, што адбываецца ў Беларусі ў апошнія месяцы — настолькі гэта страшна. Хоць ад пакут, якім сёння падвяргаюцца беларусы, можна анямець. Усё часцей, чытаючы хроніку рэпрэсій у Беларусі, я ўспамінаю фільм Элема Клімава і Алеся Адамовіча пра жахі Другой сусветнай вайны «Ідзі і глядзі».
Але сёння не 1937-ы, і не 1941-ы. Сёння 2020 год. Беларусь — геапалітычна надзвычай важная незалежная краіна ў цэнтры Еўропы. Свет павінен і можа неадкладна спыніць гэты генацыд.
Як казаў адзін з бацькоў геапалітыкі брытанец Хэлфард Макіндэр «той хто кантралюе Усходнюю Еўропу… той кантралюе ўвесь свет». У 21 стагоддзі яго словы могуць гучаць так: «Калі дэмакратыя і свабода перамогуць у Беларусі і Украіне, то яны перамогуць ва ўсім свеце».
За 26 гадоў мы добра вывучылі гэты рэжым. Мы ведаем, чаго ён баіцца. Ён баіцца канкрэтных эканамічных санкцый.
Мы бачылі гэта на канкрэтных прыкладах. У 2008 годзе палітвязняў, уключаючы кандыдатаў у прэзідэнты, вызвалілі пасля таго, як ЗША ўвялі санкцыі супраць «Белнафтахіма» — дзяржаўнага прадпрыемства, якое пастаўляе нафтапрадукты на Захад. У 2012 годзе шэраг палітвязняў былі вызваленыя з турмаў з-за дэмаршу амбасадараў ЕС, якія пакінулі Беларусь, і адмовы еўрапейскіх банкаў выдаваць крэдыты рэжыму Лукашэнкі. Такім жа чынам, з-за санкцый, у 2015 годзе пасля пяці гадоў зняволення выйшаў на волю кандыдат у прэзідэнты Мікалай Статкевіч і іншыя вязні сумлення.
Я асабіста ведаю, як рэжым баіцца санкцый. У 2011 годзе мяне вызвалілі з ізалятара КДБ пад падпіску аб нявыездзе толькі таму, што ЕЗ абвясціў аб намеры (!) увесці эканамічныя санкцыі. Калі, седзячы ў Беларусі пад наглядам міліцыі і спецслужбаў, я пісала артыкулы з заклікам да Захаду ўводзіць санкцыі супраць дыктатуры, мяне тут жа пачыналі трэціраваць: міжвольныя арышты, запалохванні, шантаж, пагрозы з патрабаваннем перастаць пісаць пра эканамічныя санкцыі, інакш мяне неадкладна зноў заключаць пад варту.
Таму я ведаю на ўласным досведзе: яны баяцца толькі аднаго — эканамічных абмежаванняў. Гэта тое, што абавязкова заб’е гэтага дракона і вызваліць Беларусь ад фашызму.
Я згодная з патрабаваннем увесці санкцыі супраць рэжыму Лукашэнкі за злачынствы супраць чалавечнасці:
- адключыць рэжым ад міжнароднай міжбанкаўскай сістэмы SWIFT;
- замарозіць рахункі дзяржаўных прадпрыемстваў за мяжой;
- спыніць закупкі нафтапрадуктаў, вырабленых у Беларусі;
- увесці эмбарга на любыя здзелкі з кампаніямі, якія падтрымліваюць рэжым;
- абвясціць карныя органы Лукашэнка тэрарыстычнымі арганізацыямі;
- санкцыянаваць арышт у любым пункце свету міжнароднымі і нацыянальнымі судамі асоб, вінаватых у злачынствах рэжыму;
- выслаць усіх паслоў рэжыму як памагатых злачынстваў.
Заклікаю ўсіх людзей свету, палітыкаў, праваабаронцаў, журналістаў дапамагчы нам ўвесці гэтыя захады супраць дыктатуры. Гэтым вы ўратуеце жыцця канкрэтных людзей. Выратуеце беларускую нацыю і цэлую краіну.
Слоганам майго любімага фільма «Спіс Шындлера» стала цытата з Талмуда: «Той, хто ратуе адно жыццё, ратуе цэлы свет». Я хачу сёння сказаць: «Ратуючы беларусаў, вы ратуеце не толькі нацыю і краіну, вы ратуеце цэлы свет». Таму што бяззбройныя і безабаронныя беларусы сёння праліваюць кроў за свабоду ад рабства і тыраніі. Зыход бітвы паўплывае на ўсё чалавецтва.
