Андрэй Прыстаўка атрымаў пералом падчас затрымання
У берасцейскага праграміста і ўдзельніка пратэстаў супраць вынікаў выбараў можна назіраць накладзены на левай руцэ гіпс.
Вось што кажа сам Андрэй Прыстаўка на гэты конт:
– Калі мяне гэтым разам затрымалі ў Менску, то мяне ў бусе збівалі дубінкай, і ў тым ліку вось пералом шлэйнага адростку локцевай косткі апынулася. Магчыма АМАП, але яне магу сцвярджаць, у чорным камуфляжы. Падчас збіцця, я думаю, што ў мяне яшчэ і страсенне мозгу было, таму я вельмі цьмяна памятаю. Памятаю, што мяне білі, тым больш я ляжаў тварам у падлогу, мне не дазвалялі глядзець на супрацоўнікаў. І я выключаўся кожную вольную хвіліну, мозг так страхуецца, я чуў, што падчас страсення некаторыя моманты сціраюцца з памяці. Мяне адзін раз агледзеў фельчар у Жодзіна, які рэкамендаваў зрабіць здымак. Але гэтую рэкамендацыю праігнаравалі ўсе тыя, хто мог. Ніхто ніяк не адрэагаваў на гэтую рэкамендацыю. І калі я выйшаў на волю, пайшоў у траўмапункт, там мне дыягнаставалі пералом.
Ці звяртацца з заявамі ў адпаведныя органы, Андрэй Прыстаўка пакуль дакладна не вырашыў, бо непакоіцца пра тое, што за такое могуць прыцягнуць да чаго яшчэ. У суме за ўдзел у акцыях супраць вынікаў выбараў праграміст ужо 6 разоў затрымліваўся, быў аштрафаваны на 60 базавых велічыняў штрафу і «адсядзеў» 39 сутак. Таксама вядома, што падчас апошняй «адсідкі» яму даслалі чарговую позву ў суд, які ўжо мусіў адбыцца.
Беларускае Радыё Рацыя
Фота са старонкі Андрэя Прыстаўкі ў vk.com
Глядзіце таксама
