Міністр працы выказалася пра скарачэнне дэкрэтнага
Міністр працы і сацыяльнай абароны Ірына Касцевіч выказалася на тэму магчымага скарачэння ў Беларусі дэкрэтнага адпачынку. На яе думку, «калі ў краіне будуць забяспечаны паслугі па догляду за дзецьмі ранняга ўзросту, адкрыты максімальна ясельныя групы, мамы самі актыўна пойдуць на працу», перадае тэлеканал АНТ.
У Ірыны Касцевіч пацікавіліся, што яна думае як міністр і як жанчына, ці варта скарачаць дэкрэтны адпачынак і якія яшчэ дадатковыя меры падтрымкі могуць быць для мам.
— Па догляду за дзіцем ва ўзросце да трох гадоў, напэўна, у нашай дзяржаве самая значная і высокая льгота і гарантыя у параўнанні з іншымі краінамі свету. Пры гэтым, гэта не проста тры гады, а аплатных тры гады, — сказала Ірына Касцевіч. — Наколькі правільна скарачаць — не скарачаць? Мы прааналізавалі, як сёння карыстаюцца гэтай гарантыяй нашы мамы. Дзеткі, якія з года да трох, 68 000 дзяцей рэгулярна на пастаяннай аснове наведваюць дзіцячы садок. Мамы, якія выйшлі на поўную занятасць, — крыху больш за шэсць тысяч. Значыць, у дадзенай сітуацыі дзяржава двойчы льгатуе, падтрымлівае маму.
— Вы ў які бок схіляецеся: да скарачэння ці ўсё ж такі, каб пакінуць? — удакладнілі ў міністра.
— Калі ў краіне будуць забяспечаны паслугі па догляду за дзецьмі ранняга ўзросту, адкрыты максімальна ясельныя групы, мамы самі актыўна пойдуць на працу, — адказала Ірына Касцевіч.
Нагадаем, 20 лістапада Аляксандр Лукашэнка заявіў, што «лічыць важным абмеркаваць магчымасць скарачэння водпуску па догляду за дзіцем, які ў Беларусі цяпер доўжыцца да дасягнення дзецьмі трох гадоў і з’яўляецца адным з самых працяглых у свеце». Адначасова з гэтым Лукашэнка таксама сказаў, што «калі кожная жанчына не народзіць дваіх-траіх, будзе як у Еўропе, Расіі, Украіне».
Што раней чыноўнікі казалі пра дэкрэтны адпачынак
Пытанне скарачэння аплачванага водпуску па догляду за дзіцем абмяркоўваецца ў Беларусі ўжо некалькі гадоў. Паменшыць дэкрэтны адпачынак на адзін год прапанаваў яшчэ ў 2016 годзе Кірыл Руды, які на той момант быў памочнікам прэзідэнта. Праз нейкі час некалькі разоў чыноўнікі і парламентарыі то абвяргалі такую магчымасць, то гаварылі аб яе эканамічнай мэтазгоднасці.
У Мінпрацы ў чэрвені 2018 года адзначалі, што дэкрэтны адпачынак не маюць намер скарачаць, «нягледзячы на тое, што ў шматлікіх краінах ён значна карацейшы, чым у нас». У ліпені гэтага года ў ведамстве пацвердзілі, што скарачэнне водпуску па догляду за дзіцем у бліжэйшы час не плануецца.
У нашай краіне водпуск па догляду за дзіцем могуць даць аднаму з бацькоў або іншаму члену сям’і, які будзе даглядаць дзiця, пакуль яму не споўніцца 3 гады. Пры гэтым на яго будзе налічвацца дапамога. Водпуск па догляду можа быць выкарыстаны поўнасцю або часткова. Акрамя таго, у дэкрэтным адпачынку можа знаходзіцца пастаянна адзін бацька або абодва па чарзе.
Акрамя таго, змены ў Працоўны кодэкс прадугледжваюць, што мужчыны (пры іх жаданні) могуць сыходзіць у кароткачасовы адпачынак пры нараджэнні дзіцяці — да 14 дзён. Пры гэтым зарплата не захоўваецца.
