Паэт-пчаляр Мікола Папека затрыманы па крымінальнай справе (абноўлена)
Пра гэта з’явіліся паведамленні ад сяброў і паплечнікаў паэта ў сацыяльных сетках. Паводле іх, адбылося гэта ў 06:45 раніцы 30 лістапада, пасля чаго Міколу Папеку павезлі ў Берасце.
Інфармацыю пацвердзілі і берасцейскія праваабаронцы «Вясны», дадаўшы што ён затрыманы па крымінальнай справе і знаходзіцца ў ІЧУ Ленінскага раёна Берасця. Па якім эпізодзе, пакуль невядома.
Сітуацыю з падазраванымі па крымінальнай справе каментуе праваабаронца Уладзімір Вялічкін:
– Ідзе поўнамаштабны наступ на свядомасць усіх, каб тыя супынілі свае грамадскія дзеянні, каб памяняць нешта ў гэтай краіне. Ён выклікае яшчэ больш абурэння, і людзі разумеюць, што гэта проста здзекуюцца, каб напужаць усіх астатніх.
Ад сяброў Міколы Папекі, якія спасылаюцца на ягоную жонку, вядома што з ім працуе адвакат, які будзе інфармаваць пра ягоную справу сваякоў.
«На дадзены момант з ім усё добра», – паведамілі сябры. Праваабаронцы дадаюць, што перадачу для паэта-пчаляра можна перадаць у сераду з 10 да 12 раніцы. Адправіць тэлеграму ці ліст, па стане на сённяшні дзень, яму можна на адрас: Берасце, вул. Паўночны Гарадок, 10, ізалятар часовага ўтрымання.
Беларускае Радыё Рацыя
***
Сёння раніцай супрацоўнікі міліцыі затрымалі на Пружаншчыне сябра Саюза беларускіх пісьменнікаў, паэта і пчаляра Міколу Папеку.
Спадар Мікола паспеў толькі паведаміць сябрам, што яго вязуць у Берасце.
Мікола Папека жыве ў вёсцы Лінава на Пружаншчыне. У 1999 годзе выдаў зборнік вершаў “Чарнавікі” з прадмовай Міколы Купрэева. Гэты зборнік у 2000 годзе атрымаў прэмію “Гліняны вялес-99”.
А яшчэ Мікола Папека з’яўляецца заснавальнікам штогадовай літаратурнай “Мядовай прэміі”, пераможца якой штогод атрымлівае пуд мёду.
Аксана Шпак, Беларускае Радыё Рацыя
Глядзіце таксама
