Нямеччына збіраецца стварыць спецыяльны фонд для абыходу санкцый ЗША
Нямеччына, паводле дадзеных нямецкага часопіса «Більд», збіраецца стварыць спецыяльны фонд для абыходу амерыканскіх санкцый супраць праекта «Паўночны паток-2». Будаўніцтва газаправода хочуць завяршыць як мага хутчэй.
У нямецкай зямлі Мекленбург – Пярэдняе Памор’е ўжо ў бліжэйшыя дні можа з’явіцца новы фонд абароны клімату. Фармальна менавіта яму, як паведамляе «Більд», будуць падаваць свае паслугі нямецкія кампаніі, якія працуюць над «Паўночным патокам-2». Паводле дадзеных выдання, такім чынам чыноўнікі плануюць засцерагчы нацыянальны бізнэс ад новых санкцый Вашынгтона, якія павінны ўступіць у сілу ўжо ў студзені. Крыніца часопіса сказала, што немцы чакаюць, што быццам гэтая схема дазволіць і завяршыць расейскі дзяржаўны праект, і пазбегнуць страт для прадпрымальнікаў.
Афіцыйна ўлады Нямеччыны інфармацыю аб стварэнні новага фонду абароны клімату яшчэ не каментавалі.
Паводле першапачатковага плану газаправод павінен быў запрацаваць у 2019 годзе, але летась у снежні працы прыпынілі з-за санкцый. На мінулым тыдні ў кампаніі Nord Stream 2 AG абвясцілі, што будаўніцтва завершана ўжо больш чым на 90 працэнтаў і аднавіць яго збіраюцца да канца года. «Паўночны паток-2» будуецца з 2016 года.
Газаправод мае звязаць Расею і Нямеччыну ў абыход Польшчы і краін Балтыі.
Беларускае Радыё Рацыя
![](/wp-content/uploads/2022/04/racyja_app_1200x300.jpg)