Звольненая Вольга Брыцікава — пра стачку і настроі на „Нафтане”
У чацвер, 3 снежня, у начальніка аддзела рэалізацыі нафтапрадуктаў ААТ «Нафтан» і актывісткі Вольгі Брыцікавай быў апошні працоўны дзень. Напярэдадні яе звольнілі, папярэдне пазбавіўшы доступу да дзяржаўнай таямніцы. Пасля гэтага на прадпрыемстве рушылі ўслед сыходы некалькіх работнікаў у стачку.
На думку Вольгі Брыцікавай, яны збольшага могуць быць звязаныя з яе звальненнем, але асноўная прычына – ўзмацняецца ціск з боку кіраўніцтва. «Чалавек, які мае грамадзянскую пазіцыю і быў прафесіяналам да жніўня, і цяпер застаецца прафесіяналам, проста да яго змянілася стаўленне. Думаю, што гэта і правакуе сыход у стачку», – лічыць яна.
Сама пра сябе Вольга кажа, што «нейкіх яркіх змен у жыцці за адзін дзень пакуль не адбылося».
– У першую чаргу трэба ўсвядоміць, што можна зрабіць са звальненнем, якое, як мы лічым, не было аформлена належным чынам. Я думаю, нейкі час мы на гэта выдаткуем, – кажа Вольга. – Разбірацца з гэтым пытаннем я буду пры дапамозе незалежнага прафсаюза, таму што гэта той прафсаюз, які абараняе. І яшчэ планую, як і раней, заставацца на сувязі і дапамагаць працаўнікам, якія цяпер сутыкаюцца з ціскам з боку начальства. Думаю, усё гэта пакуль будзе займаць ўвесь мой час і сілы.
Аб пошуку новай працы Вольга пакуль не думала, як і пра тое, каб з’ехаць за мяжу.
– Адназначна хачу сказаць, што я не збіралася і не збіраюся з’язджаць. Гэта можа стаць толькі нейкай вымушанай мерай, і сёння я гэтую меру не разглядаю. Беларусь – мая радзіма, і я хачу жыць і працаваць тут. І я веру, што гэта магчыма, – тлумачыць Вольга.
Звальненне Вольгі Брыцікавай – не адзінае падзея на прадпрыемстве за апошнія дні. Так, па дадзеных телеграм-канала «Стачка Нафтана», 3 і 4 снежня пра сыход у стачку абвясцілі некалькі вопытных работнікаў прадпрыемства: слесар аварыйных аднаўленчых работ Мікалай Зелянкевіч (7 гадоў стажу), юрысконсульт Аляксандр Капшуль (20 гадоў стажу), аператар тэхналагічных установак Сяргей Скіба (17 гадоў стажу), аператар тэхналагічных установак Алег Кунцэвіч (17 гадоў стажу). Таксама ў стачку сышлі апаратчык заводу «Палімір» Андрэй Шкірэнка (30 гадоў стажу) і работнік ААТ «Полацк Шкловалакно» Людміла Каляда (10 гадоў стажу).
Вольга мяркуе, што яе звальненне таксама магло ўзмацніць страйкавую актыўнасць, але ў першую чаргу, на яе думку, гэта было выклікана тым, што «выхаду няма, а ціск узмацняецца, таму узмацняюцца і такія настроі».
– Сёння сапраўды быў ўсплёск сыходаў ў стачку спецыялістаў рознага ўзроўню. Выдатны юрысконсульт, аператары – гэта людзі з вялізным вопытам і стажам працы, з высокай кваліфікацыяй, – кажа Вольга. – Наваполацк – невялікі горад, «Нафтан» – горадаўтваральнае прадпрыемства, у многіх сем’ях некалькі пакаленняў працавалі на «Нафтане». Так і ў маёй сям’і, і ў маіх калегаў. Тое, што з намі адбываецца цяпер, як з намі размаўляюць непасрэдныя кіраўнікі і кіраўнікі больш высокага рангу, – гэты ціск зыходзіць ад людзей, з якімі ты працаваў і знаходзіўся побач доўгі час. Да жніўня 2020 года не было праблем, а цяпер за грамадзянскую пазіцыю пачынаюцца нейкія разборкі на прафесійным узроўні. Трэба нейкім чынам падзяляць гэтыя рэчы. Чалавек, які мае грамадзянскую пазіцыю і быў прафесіяналам да жніўня, і цяпер застаецца прафесіяналам, проста да яго змянілася стаўленне. Думаю, што гэта і правакуе сыход у стачку. Стачка – гэта акт грамадзянскага непадпарадкавання. Людзі даведзены да нейкай крайняй кропкі, і адзін з выхадаў, а часам і адзіны выхад – гэта менавіта стачка. Так што мы ўсе будзем працягваць рух наперад.
