Спынілі прыём кніг у СІЗА
15 снежня 2020 года знаёмая панесла харчовую перадачу блогеру Шэраму КатУ ў СІЗА на вуліцы Валадарскага ў Менску і пераказала такую інфармацыю;
„Што тычыцца перадачы кніг.
На маё пытанне сёння адказалі, што спынілі прыём кніг, у тым ліку падручнікаў і навучальных дапаможнікаў.
Спытала, дзе гэта напісана, дзе пра гэта аб’ява?
Адказ: гэта распараджэнне для нас (тых, хто прымае перадачы) ад нашага начальства.
Акрамя таго, атрымала ліст ад Афнагеля Яўгена, дзе ён піша, што адпраўленыя яму 2 падручнікі па менеджменце яму перададзены не былі.
Я, калі размаўляла сёння з прыёмшчыцай, спытала, а якія тады кнігі можна перадаць?
Адказ: ніякія, распараджэнне начальства”.
Усё адбывалася пад мурамі Валадаркі – Пішчалаўскага Замка, дзе зняволены Якуб Колас ствараў „Новую Зямлю”,
Пра гэта пісаў Алесь Бяляцкі:
„Магутны падмурак нашай літаратуры – паэма, напоўненая тугой па свабодзе і любоўю да Радзімы, “Новая зямля” Якуба Коласа – была задуманая, вымарылася і пачала стварацца ў Пішчалаўскім замку, дзе месціцца сёння СІЗА на Валадарскага ў Менску”.
Цікава, ці перадавалі Якубу Коласу кнігі з Волі?