Аляксей Сігаеў: Змены Выбарчага заканадаўства патрэбныя ўсім
У Менску на круглым стале рабочая група па падрыхтоўцы праекта новага Выбарчага кодэкса прадставіла папярэдні варыянт дакумента. Дакумент ствараўся па ініцыятыве штаба экс-кандыдата ў прэзідэнты Святланы Ціханоўскай.
Пра дакумент распавядае адзін са стваральнікаў, першы намеснік старшыні БСДП Аляксей Сігаеў:
– Нормы выбарчага заканадаўства нам патрэбныя. БСДП, як партыя, з’яўляецца адным з актыўных удзельнікаў кампаніі “Права выбару” ўжо на працягу шмат гадоў. Адпаведна ёсць пэўны досвед і бачанне таго, як трэба змяніць падыход да выбарчага працэсу. Таму мы таксама прымалі ўдзел у гэтай групе. Канешне, сама група была створана па прапанове Святланы Ціханоўскай, і асноўным мадэратарам там выступаў Леў Марголін.
Аляксей Сігаеў адзначыў, што прадстаўнікі БСДП выступалі за “галасаванне за партыі”.
– За прапарцыйную мажарытарную сістэму. А гэта значыць, што ўводзіцца яшчэ такі панятак – галасаванне за партыю.
РР: Як у Швецыі, напрыклад, ці ў Германіі?
– У Швецыі там цалкам ідзе галасаванне па партыйных спісах. Прыклад бліжэйшы – гэта Україна, дзе ёсць і аднамандатныя акругі, і так называемыя шматмандатныя акругі, менавіта калі за партыі галасуюць.
Па словах палітыка ў дакуменце, які падрыхтаваны прадстаўнікамі 13 палітычных партый, змены тычацца таксама правілаў рэгістрацыі кандыдатаў, скасавання дзвюхпалатнага парламенту, пашырэння правоў назіральнікаў.
Беларускае Радыё Рацыя
Фота Сяргея Апановіча
